Han tar grepet om HR-taumane på Hydro Husnes

Kaldestad tar over etter Eivind Torvik som flytta tilbake til Sunndal tidlegare i år.

– Eivind gjorde ein framifrå jobb på Husnes, mellom anna å setja bedrifta på ulike kart. Vi er ulike personar men jobbar begge mot Hydro sine mål, strategiar og kva som er på dagsorden til kvar ei tid, seier Kaldestad

Rekruttering

Med B-hallen stadig nærare full drift, er rett arbeidskraft ein nøkkel for Hydro Husnes.

– Det er stor etterspurnad etter arbeidskraft i Sunnhordland. Me rekrutterer for tida prosessoperatørar, og der ser det ut til at me får tak i det me treng. Der kan me tilby dei vidare utdanning etter dei er tilsette, og Hydro har gode løp vidare for dei som er motiverte for det. Men på til dømes automasjonsteknikar og IT-ingeniørar er etterspurnaden og konkurransen om arbeidskrafta større. Det er spesialutdanningar som det er færre å ta av til, påpeikar Kaldestad.

Sjølv om det er lett å tru at namnet er lokalt, er 54-åringen snar med å påpeika at det kjem frå Kvam.

– Det er kalde stader over Norheimsund også, humrar han,

Ein HR-sjef hos Hydro Husnes er noko anna enn det ein tidlegare kalla personalsjef. «Human Resources» heiter det på oversjøisk, menneskelege ressursar på godt nynorsk.

– Hydro har ulike HR-kompetansar samla i systemet, og dekker godt alle fagfelt, legg han til.

Kommunikasjon

No er ein 340 tilsette ved Hydro Husnes, etter å ha auka opp med rundt 100 nye etter at arbeidet med å opna B-hallen starta.

– Me prøver å få ein god balanse på kjønn, alder og etnisitet, og ønskjer at Hydro Husnes i så måte skal reflektera samfunnet me er ein del av, seier han.

Om ein månad er alle omnane i B-hallen starta opp, og jobben med å optimalisera prosessane kan få enda større fokus.

– Det er mykje nytt som skal tilpassast. At me har starta 200 nye celler i B-hallen er den største delen av utvidinga, men i totalen så utgjer det likevel berre ein del av oppstarten. Det er mykje nytt utstyr, nye køyretøy som er komne til, utviding av støyperikapasiteten og l produksjon av nytt produkt som går til deler i bilproduksjonen.

Kompetansebehovet endrar seg, og det møter me mellom anna med å ha mange opplæringsløp for våre tilsette gåande samtidig, forklarer Kaldestad.

Han ser på samferdsle og kommunikasjon som avgjerande for framtida til bedrifta.

– Det er eit viktig moment for oss kva ein gjer for å behalda arbeidskrafta me får til Hydro Husnes og Kvinnherad. Me får lynande intelligente og dyktige folk på mange fagfelt hit, og viss ikkje dei blir etablerte med familie, så ser me at nokon av dei trekkjer tilbake til heimetraktene sine, spesielt viss dei kjem frå andre sentrumsområde, t.d. Bergensområdet. Gode kommunikasjonar er ein nøkkel for å få dei til å bli verande, vurderer HR-sjefen.