Han er ny leiar for skisenteret

Innan søknadsfristen 10. oktober var det to personar som hadde søkt på deltidsstillinga som dagleg leiar for Fjellhaugen skisenter AS. Den eine var Steinar Albrethson frå Omvikdalen (56), medan den andre trekte søknaden. No er naturleg nok Albrethson tilsett.

– Vi har heldige som har fått han. Steinar har godt med erfaring etter 20 år som frivillig i skisenteret. Han har pågangsmot, engasjement og kjennskap til skisenteret, og brenn for at det skal vera eit slikt tilbod i Kvinnherad, seier styreleiar Sissel Haugen.

Albrethson er allereie i full gang med jobben med å utvikla anlegget vidare, etter å ha starta 1. november.

– Så no håpar vi berre at det skal koma snø, smiler Haugen.

Ho legg elles til at skisenteret gjerne skulle hatt med seg eit par personar ekstra til å drifta kiosken i Fjellhaugen gjennom vinteren.

Bensindrive

Steinar Albrethson sjølv er glad for tilliten.

– Eg har jo vore med i gamet i mange tiår. Eg rekna over det her om dagen, og fann ut at den spede byrjinga for min del var på midten av 80-talet, før det var kome veg opp til skisenteret. Den gongen var trekket på andre sida av elva. Trekket var bensindrive og bestod av tau. Vart det for mykje belastning på motoren, så stoppa det. Då måtte alle sleppa taket, slik at vi fekk starta motoren igjen, humrar Steinar Albrethson.

– Seinare vart det litt til og frå, men eg har i alle fall vore frivillig i over 20 år, legg han til.

Albrethson jobbar til vanleg hjå Boliden i Odda på tredje året, i samband med den store utvidinga der. Vervet i Fjellhaugen kjem som eit tillegg.

– No er ikkje Fjellhaugen skisenter berre eit skitrekk; det er også ljosløype, langrennsarena og parkeringsplassar, i tillegg til mange framtidsplanar. Så det er noko heilt anna enn å vera frivillig, seier den nye daglege leiaren.