Han blir ny informasjons- og kommunikasjonsrådgjevar

Gunn Berit Sandnes Fosse fortel i ei pressemelding at det var svært mange gode søkjarar til stillinga, men at det då er Håvard Sætrevik som er tilsett.

– Sætrevik tiltrer i jobben frå 01. november, og han vil få ansvar for dagleg drift av kommunen sine sosiale kanalar med aktuelt kommunalt stoff, strategisk plan- og omdømmearbeid og kommunikasjonsfagleg rådgjeving for tenesteområda våre. Me ser fram til å få Håvard på plass i stillinga, seier Fosse i pressemeldinga.

Framleis plagast

Mannen sjølv fortel at det på ingen måte var ei lett avgjersle å ta.

– Eg synest at det ser ut som ein veldig spanande jobb, men å skulle slutta i den jobben eg har, og slutta hjå den arbeidsgjevaren som eg har hatt i over 24 år, har ikkje vore lett. Det vil sjølvsagt bli ein overgang, men likevel er det fleire arbeidsoppgåver som vil fortona seg like, seier Sætrevik om tilsetjinga.

– Det er likevel endå lenge til eg skal byrja i denne jobben, og Grenda sine lesarar må framleis plagast med min «byline» i tida framover, legg han til.

Styreleiar for Grenda Knut Førland seier i ein uttale at dei svært gjerne skulle hatt Sætrevik med seg vidare, samtidig som dei har forståing for valet.

– Det er alltid trist å mista gode ressursar, og me skulle svært gjerne hatt Håvard med oss vidare. Han har sett mange gode og svært tydelege spor etter seg. Samtidig har me forståing for at Håvard no etter snart 25 års fartstid i Grenda søkjer nye utfordringar. Kvinnherad kommune er heldige som får han på laget, seier Førland avslutningsvis.