Halsnøy-maskot fann vegen til NRK Super: - Han er ein sjuk fyr!
Måndag sat nokre skuleelevar på Halsnøy skule og åt nista si medan dei såg på Supernytt. Brått dukka det opp ein figur på skjermen som dei drog kjensel på.
G11-laget til Halsnøy IL har ein riktig søt maskot – ei plysj-gås dei kallar «Geir the Goose». Dette er Eliah Modøl Juel sin bamse, og alt starta med ein biltur på veg til fotballkamp i april ein gong.
– Eg tok berre med gåsa på gøy, fortel Eliah Modøl Juel.
Annonse
Sprø fotballkommentator
Med i bilen sat også Oskar Haugland Sjo og Isak Øvstebø Tofte. Saman laga dei ein video av Geir the Goose som hadde engasjerte spådomar om kampen som snart skulle spelast.
– Og så tok me sånn voice-changer på stemma etterpå. Han hadde sine meiningar om kampen, men det gjekk jo ikkje så bra som han påstod då, ler Isak.
Nokså kjapt vart det ein tiktok-konto av videoane med Geir, der han gav kommentarar før og etter fotballkampane. Heile laget har tatt til seg maskoten Geir the Goose, sjølv om han visstnok er ein sprø type.
Annonse
– Korleis er Geir, eigentleg?
– Han er ein sjuk fyr! Han slo hól i hovudet på meg med ei medalje ein gong, utbryt Oskar.
– Ja, han har ikkje heilt kontroll. Han har nett fått nye auge, for han mista dei han hadde, ler Eliah.
Idémyldring på huskestativet
Ein dag dei tre Halsnøy-gutane vart tidleg ferdige med matlaginga i mat og helse, sat dei og prata litt om Geir sin tiktok.
– Me sat på reilo og snakka om at hypen rundt Geir hadde lagt seg litt, og at det hadde vore kjekt å leggja ut noko kvar dag, seier Isak.
Annonse
Slik kom idéen om ein adventskalender. Dei fann fram ark og skreiv ned idéar til kva Halsnøy-gåsa kunne finna på i videoane for kvar kalenderluke. Dersom ein finn Geir the Goose på tiktok kan ein sjå at han både skyt brassespark, hoppar ut av vindauge og gjer andre stunt.
– Me brukte vel ChatGPT òg for å finna nokon idéar, innrømmer Oskar.
Plutseleg på Supernytt
– Fekk de beskjed frå NRK Super om at Geir the Goose skulle visast på Supernytt?
– Nei, me visste ingenting! Det var Harald og dei i femte som sprang ut og sa det. Dei hadde sett på Supernytt i mat-timen, og berre «Geir er på Supernytt!» Og me berre «Yes!»
Gutane snakkar ivrig i munnen på kvarandre når dei fortel om at Geir har vorte TV-kjendis. Det var i eit innslag om julekalenderar at Supernytt viste fram Halsnøy-maskoten. Og det er tydeleg at dette er den store snakkisen på Halsnøy Skule om dagen.
Annonse
På Supernytt vert Geir the Goose trekt fram som ein bra julekalender. Kanskje kan dette føra til fleire følgjarar for den snakkesalige gåsa? Me er spent på korleis det går, og håpar i det minste han ikkje mister fleire auge.
