Halsnøy G16 vart serievinnarar
Halsnøy IL G16 held fram med gode prestasjonar. Søndag vann dei den siste kampen for sesongen, og laget vart seriemeister i si avdeling.
– Det er ein svært god prestasjon, for det er gode lag me har møtt, seier ein tydeleg stolt trenar, Richard Erlandsen.
Laget har hatt ei kort, men lukkeleg historie. Dei hadde oppstart i januar, og alt i sommar hadde dei suksess på Norway Cup, der dei kom til kvartfinalen. Dei spelte då sjuarfotball, men har sidan fått fleire spelarar. Med litt hjelp frå G14-laget, kan dei no spela ellevarfotball.
Annonse
Vann 4-0 i serieavslutninga
– Då kom me i ei pulje med Bergens-lag. Der har me hatt berre eitt tap, og elles sigrar og uavgjort, fortel Erlandsen.
Søndagens kamp var mot Kvernbit, som då låg på andreplass på tabellen. Det laget som vann kampen ville stå som serievinnarar, så det var ei ekstra spanande sesongavslutning. Det var mange halsnøybuar som var på tribunen og heia fram gutane, som slo Kvernbit 4-0.
– Me er både stolte og nøgde med å ha prestert så bra med denne kjekke gjengen med gutar, avsluttar Richard Erlandsen.
