Halsnøy-fiskar har kjøpt næringstomt: - Burde vore gjort for 30 år sidan

Det var eigedomen til Willy Ommer i Heiavegen 86 som vart selt til Kvinnherad kommune i slutten av september. Kommunen disponerte huset frå 1. november, og overtek det i desember. Ettersom Ommer har nytta huset til lagring av fiskeutstyr, måtte han no finna ei anna løysing.

Grenda møter han ved industriområdet i Landamarka. Her har fiskaren allereie køyrt inn store delar av utstyret sitt. Næringstomta er på 1,2 mål og kostar nærare 1 million kroner. Tomta har han store planar for.

– Huset har jo fungert som ein oppbevaringsstad, og sidan kommunen overtek det ganske snart, måtte eg skaffa meg noko nytt. Det er ikkje mange næringstomter her på Halsnøy, men valet fall på ei tomt ved industriområdet i Landamarka. Tomtestorleiken passar meg godt, og eg er svært nøgd, smiler Ommer og legg til:

– Tomtekjøpet vart unnagjort i ein fei, og det må eg takka Kvinnherad kommune for. Eg er imponert over at det har gått såpass fort og smertefritt. Kommunen har endå fleire tomter til sals her ved industriområdet, så det er berre å hiva seg rundt for dei som er på leit etter ei næringstomt. Det er eit flott område, seier han.

Krevjande

På tomta har allereie NCC vore og lagt asfalt, i regi av Sau og Sånt. Vidare ynskjer Ommer å få opp ein plasthall.

– Formålet med tomta er å setja opp ein hall for å ha ein stad å lagra utstyr. Fram til no har eg hatt utstyret både her og der, mellom anna heima hos meg sjølv og bror min. Det er har vore krevjande og stressande, så å få alt samla på ein stad ser eg fram i mot, fortel Ommer og held fram:

– Etter kvart ynskjer eg å få opp ein betre hall. Då er tanken ein stålhall som i tillegg til lagring kan fungera som eit verkstad. Det er alltid kjekt med ein stor og romsleg plass når eg mellom anna sveisar og ordnar med utstyr. Eg har hatt bruk for dette lenge, så ei slik tomt skulle eg kjøpt for 30 år sidan, ler han.

Plast-hallen håpar Ommer å få på plass i vinter.

Lofotfiske

No ser Ommer fram til lofotfisket i februar. Då reiser han nordover i ein nokså ny og moderne sjark, saman med sonen. Lofot-fiske har han drive med i over fem år, og han gler seg like mykje kvar gong. Elles i året er han stort sett åleine om fiskarjobben.

– Eg og sonen min, Willy André, reiser nordover første veka i februar. Då plar me å vera der eit par månadar på vinteren. Elles går det i leppefisk på sommaren, og garnfisk, sei og lyr mellom sesongane, fortel han.

Fiskebåten han nyttar vart bygd førre året, og er ein Nordan 35 fot kombinert båt for garnfiske, teinefiske og leppefiske.

– Eg er svært nøgd med båten, og det må eg nesten vera då den kosta meg rundt 4,3 millionar kroner, ler Ommer.

Førre året kjøpte han også ei kvote til 6,5 millionar kroner. Kvota er i hovudsak kjøpt for å vera med på Lofotfiske, der den gjeld for båtklassen 10-11 meter.

– Kvoten er på 50 tonn torsk, ca 15 tonn hyse og 432 tonn sei. Når det gjeld leppefiske har eg tre kvotar, der kvar kvote inneheld 48.000 stykk leppefisk.

Godt fiskarmiljø

– Korleis er det å vera fiskar på Halsnøy?

– Det er eit svært godt fiskarmiljø her. Me støttar kvarandre, og er der om det trengs. Leppefiske er jo hovudinntekta vår, og er kjærkome for oss sjark-fiskarar. Om det ikkje hadde vore for leppefiske hadde det vore lite aktivitet. Etter dei nye reguleringane har det jo vist seg å vera berekraftig, og det er flott. Så lengje det er rå å leva av det er eg nøgd, smiler Ommer.

Ommer sitt satsingsområde er torsk og leppefiske. Han håpar han får halda på fiskarjobben livet ut.

– Som fiskar er det mange flotte dagar, men også regnfulle og tunge. Det krev mykje, og ein har sine forpliktingar. Likevel gløyme ein fort dagane med ruskevêr og strev. Det er ingen dag som er lik, og ein veit aldri kva og kor mykje ein får før ein kjem på land. Det er spenninga som driv meg, og eg håpar eg får halda på med dette lengje, sluttar Halsnøy-fiskaren.