Halsnøy-elevar med «full skår»

Beintøft er ein aksjon med mål om å få fleire ungar til å gå eller sykla til skulen. Aksjonen vert arrangert årleg av Miljøagentane. Halsnøy skule har gjort det bra før, og i år kan dei også vera nøgde med 2. og 4. klasse sin innsats.

– Elevane har jobba på og vore veldig engasjerte. I prosjektet skal dei unngå å bli køyrt til og frå skulen. I tillegg får dei ulike oppdrag, som dei har gjennomført veldig bra, fortel lærar i 2. klasse Anita Askeland Jordal.

Oppdraga kan mellom anna gå ut på å kartleggja kor mange bilar som er på skulevegen, og vurdera miljø-konsekvensane opp mot behova til folk.

Miljø og trafikktryggleik

– Me har til dømes talt arbeidsbilar opp mot privatbilar. Arbeidsbilane har kanskje viktige jobbar dei er på veg til, eller skal utføra langs vegen. Men privatbilane vil me gjerne ha litt færre av på skulevegen, både for miljø og trafikktryggleik, seier Lene Lande, lærar for 4. klasse.

Lærarane håpar aksjonen fører til at ungane, og foreldra, held fram med å vurdera gåing og sykling for å koma seg til skulen. Elevane har også hatt andre oppdrag, som å plukka bos og laga kunstverk av boset. Kvar enkelt klasse samlar poeng gjennom å utføra desse oppdraga, i tillegg til å telja opp kor mange kilometer dei har spart bilen for, i løpet av dei rundt tre vekene aksjonen varar.

2. og 4. klasse ved Halsnøy skule var blant dei 13 klassane i Vestland fylke som fekk full pott av moglege poeng. Av desse klassane vart det trekt ein vinnar. I år var det Fridalen Skule i Bergen som vart trekt til fylkesvinnar. For to år sidan var det elevane som no går i fjerde klasse på Halsnøy, noko dei hugsar godt.

Motiverte elevar

– Me fekk 30 000 kroner for to år sidan, og har framleis den diplomen hengande på veggen i klasserommet. Det motiverte elevane til god innsats i år også, fortel Lene Landa.

Nasjonalt har 52 000 elevar deltatt i Beintøft, og deltakarane lagt bak seg over 1 million bilfrie kilometer, anten ved å gå, sykla eller reisa kollektivt. Miljøagentane påpeiker i ei pressemelding at dette tilsvarar 25 rundar rundt jordkloden.

– Me håpar vaksne let seg inspirera av innsatsen til elevane og let bilen stå litt oftare. Elevane har verkeleg vist at ein kan gjera ein stor skilnad saman. Det er utruleg imponerande!, Seier Annam Chaudhry, prosjektleiar for Beintøft.

At engasjementet er stort også lokalt, har Lene Lande eit døme på:

– Me har jo ein elev som bur på Husnes. Ho vart køyrt gjennom tunnelen, for så å sykla vidare til skulen, smiler ho.