Hærverk på tursti til Kaldestadåsen: – Det er trist

Ein stad mellom 40 og 50 steinheller har blitt kasta vekk frå turstien til Kaldestadåsen.

Måndag vart turgåarar på veg til Kaldestadåsen møtt av at det låg strødd ei rekkje steinheller rundt forbi på den elles så staselege turstien opp til åsen. Ein stad mellom 40 og 50 heller har blitt fjerna frå stien og kasta rundt om i skogen på strekninga i nærleiken av skiltpålen til Røsslandslia.

Steinheller som dugnadsgjengen i Turstiar Sunde har brukt fleire timar på å leggja på plass.

– Det er trist, synest eg. No har vi jobba dugnad i denne gjengen sidan 2008, og vi har utført rundt 28.000 timar med dugnad. Dei dugnadstimane vi skal i gang med no vert dei tosnaste vi har hatt, seier Bjørn Heimvik i Turstiar Sunde.

Umotiverande

For i staden for å gå laus på køen med arbeid dei har liggjande, må dugnadsgjengen no i staden prioritera å rydda opp etter hærverk.

– Vi skulle no ha brukt alle timane på anna vedlikehald fram til sommarferien, men no må vi gjera dette i tillegg. Det er både kjedeleg og umotiverande, seier Heimvik.

Han fortel at dette er første gong sidan oppstarten i 2008 at dei har vore med på noko slikt.

– Kva som har skjedd og korleis det har skjedd er vanskeleg å seia. Men det har vore nokon andre hende enn våre der. Det er cirka 40 til 50 heller som har blitt fjerna og kasta til sides. Nokon litt lenger enn andre. Eg håpar at dette er eit eingongstilfelle, for slike ting som dette er med på å øydeleggja moralen i ein dugnadsgjeng, seier Heimvik.