Hadde ikkje køyrd sykkel sidan september – vart nummer to på Rudskogen

Med avlyst fjorårssesong og mykje usikkerheit knytt til koronaen før denne sesongen, har det blitt få timar på den grøne kawasakien for Marius Ripel Jensen det siste året.

– Eg har ikkje fått køyrd sidan september. Vi har slite veldig med å koma ned på dei rundetidene og opp i den farta vi har ynskt. På grunn av det, det vetle treningsgrunnlaget og kor fort konkurrentane har køyrd, så såg vi ganske mørkt på det heile før helgas ritt, seier Ripel Jensen.

Nest best

Men då han og laget kom til Rudskogen denne helga var det noko som losna.

– Det gjorde plutseleg det. Sjølv om ein ikkje har fått trent noko på ni månadar så går ein inn i eit racemodus når ting nærmar seg. Det skjedde nok her òg, ler Marius.

Sjølv om han hadde trøbbel med eit dekk som låg og slo, kryssa Marius mållinja på bakhjulet til ein imponerande 2. plass i laurdagens fyrste ritt. Det gjorde han også når sesongens andre løp gjekk av stabelen seinare same dag. I helgas siste løp, søndag føremiddag, tok han leiinga frå start, men eit tett bensinfilter sørga for at han avslutta på ein bitter 7. plass.

– Sykkelen ville ikkje gå, filteret var så tett at det var som å køyra ein 125 kubikkar på strekkene. Men vi gav ikkje opp, og klarte å køyra inn til ein 7. plass, seier Ripel Jensen og held fram:

– Totalt sett så ligg vi som nummer to i NM etter den første helga. Det gjer vi sjølv utan treningsgrunnlag og etter trøbbel med sykkelen, så vi er veldig nøgde, seier han.

Ikkje éin meter

Nøgd er superbike-føraren også med at han endeleg kan konkurrera igjen etter ein lang koronaperiode.

– Det er supergodt å endeleg vera i gang igjen. No har det vore uvisst i mange månadar på kva som kom til å skje, og om det i heile tatt kom til å bli sesong. Så at vi endeleg kan konkurrera og vera samla som lag igjen er herleg, seier Ripel Jensen.

Neste runde av NM går av stabelen i Mo i Rana 5. til 7. august. Så spørst det om laget får trent noko særleg før det.

– Eg får ikkje køyrd ein einaste meter før vi skal til Mo i Rana. Så vi får berre sjå, ler han før han skyt inn:

– Men no veit vi kva vi slit med. Det er veldig små marginar som skal justerast før vi er heilt med i teten.