Hadde 600 gjestedøger i påska

Berre på den korta tida Grenda var nedom bubilparkeringa i Skålafjæro i 15.30-tida onsdag 31. mars, kom det nye bilar køyrande heile tida. Men sjølv om det såg temmeleg fullt ut, slo Svein Jarle Mehl og Bjørn Helge Skåle i Rosendal Bubilparkering fast at det enno var plass til fleire.

– No er det kring 75 bilar her, men om naudsynt kan vi bruka meir av Skålafjæro, i tillegg til at vi har eit par andre plassar vi kan parkera bilar. Så opp mot 100 trur eg vi skal finna plass til, sa Mehl.

Då påskehøgtida var avslutta, tok Grenda ny kontakt med Svein Jarle Mehl for å få ei oppsummering.

– Sidan veka før påske hadde vi nesten 600 gjestedøger. Så då blir det ein god del menneske som har vore her. Det meste var 106 bilar på eit døger. Men på påskeaftan forsvann dei fleste grunna dei dårlege vêrmeldingane, smiler han.

Koronareglane

Mehl understreka at alt skjedde i samsvar med koronareglane. Av den grunn er kvar bås for bilane auka til sju meter. Kommuneoverlegen var dessutan førespurd før påska starta.

– Vi gjennomførde fleire tiltak. Mellom anna tok vi kun i mot betaling via Vipps, og vi føretok grundig vasking av toalettbygget, sjølv om vi la merke til at gjestene var flinke til å bruka sine eigne anlegg. Og frå butikkane høyrer vi at nesten alt framandfolk som var på handel brukte munnbind, fortel Mehl.

Sjølv om vêret var høgst varierande gjennom påska, har bubilverten registrert at turistane var ivrige turgåarar.

– Spesielt var det mange som gjekk til Myrdalsvatnet. Så dei går ikkje berre på fjellturar når dei er i Rosendal, dei går mykje i låglandet også, analyserer Svein Jarle Mehl.