Guro er spent før junior-VM-debuten i USA

Det er berre sjukdom i tolvte time som kan føra til at Guro blir programhelt på opningsdistansen under juniorverdsmeisterskapet i USA. Den dedikerte 17-åringen har for lengst fått klarsignal for normalprogrammet.

Dermed går ein lang tids draum i oppfylling for Guro, som det siste året har jobba hardt for å få lov til å representere fedrelandet i denne meisterskapen. Det har vore alt anna enn lett å kvalifisera seg, ettersom ho har kjempa mot eitt år eldre jenter.

Det må Hålandsdalen-utøvaren også finna seg i dei neste dagane i Statane. Det uroar ikkje den målbevisste tenåringsjenta, som også kan konkurrere i den sokalla ungdomsklassen neste år. Den er øyremerkt utøvarar under 20 år.

Guro veit at det i utgangspunktet vil vere større moglegheit for å kjempa i toppen i 2023 dersom ho held seg frisk og held fram med den fine utviklinga. Femsteinevik er likevel ærleg på at ho har lyst til å gjere det bra også i år.

Ser på det som god læring

– Eg ser på dette som god læring, og ikkje minst ein gylden moglegheit til å kjenna på det internasjonale juniornivået. Dei norske utøvarane pleier å gjera det bra i junior-VM. Difor håpar eg å få nokre gode opplevingar før eg reiser heim, seier Guro og held fram.

– Det største spenningsmomentet blir høgda. Eg har ingen erfaring med tynn luft og konkurransar i 1700-1800 meters høgde, så det blir heilt nytt for meg. Allereie då vi kom hit merka eg at det er stor forskjell på å trena i høgda og i låglandet.

Guro og den norske troppen letta frå Gardermoen førre onsdag. Same kveld var dei framme i USA og den amerikanske vintersportstaden som skal vere vertskap for årets junior-VM. Blå himmel, sol og kjempefine løyper var gjennomgangsmelodien dei første dagane. På måndag snødde det og var litt tregare. Grunna høgda vart det berre rolege treningsturar dei første dagane. Måndag hadde Femsteinevik si aller første hardøkt i Statane.

Kroppen har respondert bra

– Eg tykkjer kroppen responderte bra og er nøktern optimist med tanke på det som skal skje seinare i veka. Det blir viktig å gå med hovudet, for det er lett å gå på ein smell i høgda, seier Guro, som har fått med seg kva som skjedde med dei som trakka litt for hardt på «gasspedalen» i OL.

Det vil heller ikkje vere gunstig for skytinga dersom ho har ustøe bein å stå på.

Guro skal i utgangspunktet gå tre renn i USA. Prestasjonane i disse renna vil avgjere om ho får gå stafetten.

– Eg gler meg til å koma i gang no som eg er i ferd med å få erfaring med den tynne lufta. Det blir spanande å sjå korleis kroppen taklar desse flotte omgivnadane. Eg er innforstått med at eg må disponere på ein heilt annan måte enn tidlegare, sa ho som synes det er kjekt å få gå med Norge på ryggen.