Guro (19) feirar jul på brønnbåten

Førre onsdag mønstra 19 år gamle Guro Leganger på jobb på brønnbåten «Ronja Nærøysund». I fire veker er den 87 meter lange båten både arbeidsplass og bustad. Det inneber at ho ikkje får feira julaftan heime med mor og far på Løfallstrand.

– Dette er første gong eg er vekke ved jul. Eg har ingen problem med det, sikkert verre for mamma, ler Guro.

Lange friperiodar

Ho ser etter forholda lyst på den føreståande høgtida.

– Her er det mykje kjekke folk, me får god mat og me skal liggja til kai på julaftan og første juledag. Så det blir roleg på oss, me får fri, men er om bord, forklarer Guro.

– Har du tatt med deg julepakkar?

– Ikkje tatt med meg, gadd ikkje laga plass til det i bagen, så eg opna nokon før eg reiste. Og me hadde ein liten julemiddag før eg avreise, seier jenta som er lærlingen på andre året.

– Eg kjenner litt meir på å vera vekke på nyttårsaftan. Det går seg sikkert til, eg får det sikkert bra her også, men det er nok kjekkare heime. Men eg plar ikkje tenka på kva som skjer heime når eg er ute på båten, påstår løfalljenta.

Arbeidsgjevaren hennar er reiarlaget Sølvtrans, og medan Grenda snakkar med Guro er ho på jobb utanfor øya Smøla på Nordmøre.

– No ligg me ved eit fiskeoppdrettsanlegg, og behandlar laks for lus.

– Kva gjer ein brønnbåt?

– Me lastar inn fisk – i hovudsak laks, og har han om bord ei stund. Her behandlar me han for lus, så slepp me han tilbake i merdane me henta han frå. Viss dei skal til slakting, tar me dei om bord og går til slakteriet med dei, der me legg dei i ventemerdar, forklarer Guro.

Båten høyrer vanlegvis til i småbyen Rørvik, administrasjonssenteret til den nordtrønderske kommunen Nærøysund, som har gitt namn til arbeidsstaden til Guro. Denne vinteren er brønnbåten utleigd til andre anlegg.

– Det vanlege er at eg flyr opp til Rørvik for å mønstra på, men no er det forskjellig frå gong til gong, noko som er greitt, for då får eg sett andre stader enn berre Rørvik, seier ho.

Vil bli styrmann

Båten, Guro og dei sju andre i mannskapet skal liggja til kai i Kristiansund på julaftan.

– Det er elles alltid arbeid heile tida når ein er på båten, det er ikkje forskjell på søndag og tysdag. Livet på sjøen gir meirsmak, eg liker det godt. Og så er det greitt med så lange friperiodar, er hennar vurdering.

Når ho er om bord jobbar ho vanlegvis halve døgnet og ofte nattestid, men når dei ligg til kai, har alle på dagskift.

– Veit ikkje heilt om det blir mykje jobb på 24. og 25. desember. Eg blir uansett litt i sving, trur eg.

Matroslærlingen har lasting, lossing, fortøying og vasking som sine fremste arbeidsoppgåver.

– Alt som skjer på dekk, er mine oppgåver. Eg har ambisjonar om å bli styrmann, så planen er at eg skal på fagskulen etter læretida. Eg skal rettnok i sjøforsvaret når eg er ferdig som lærling til sommaren, men etterpå blir det utdanning, seier ho.

Men først blir det jul borte frå familien, for første gong.