«Gurine» tok inn vatn på Sletta – kontakta redningsbåt

I 14-tida laurdag meldte Hovudredningssentralen for Sør-Norge følgjande på Twitter:

«Bloksen, Sletta. Seglbåt med 8 personar tar inn vatn, har behov for assistanse. RS «Horn Rescue» frå Haugesund er utalarmert, samt båtar i området er varsla. HRS koordinerer».

Litt seinare kom denne oppdateringa:

«RS «Horn Rescue» er framme ved seglbåten. Bistår med lensepumper. Situasjonen er under kontroll».

Uoversiktleg

Det viser seg at det er «Gurine», hardangerjakta som har vart restaurert i og har tilhald i Rosendal, meldingane handlar om. Men ifølgje styremedlem Bjarne Øymyr var ikkje situasjonen så dramatisk som det kan høyrast ut.

– Det som skjedde var at det kom inn noko vatn, og det er slikt som kan skje med trebåtar som har lege lenge i ro og så kjem i bevegelse igjen. Dei som var om bord vurderte det til å vera ganske mykje vatn, og sidan dei ikkje var sikre på årsaka og nok opplevde situasjonen som litt uoversiktleg, valde dei å be om assistanse. Dette for å vera på den sikre sida. Det var det einaste rette å gjera, så dei handterte situasjonen heilt korrekt, fortel Øymyr til Grenda.

Alt er på stell

Han er ikkje sjølv om bord i dag, men er blitt fortald at redningsbåten snudde kort tid etter at den kom fram til.

– «Gurine» klarte å tømma vatnet ut med eiga pumpe. Alt er no på stell, og «Gurine» fortsett turen som planlagt, seier Bjarne Øymyr.

Hardangerjakta var laurdag på ein seglas frå Spissøy ved Bømlo og sørover mot Sletta utanfor Haugesund, før ferda går attende til Espevær på Bømlo.