«Gurine» med i den kulturelle skulesekken

– Veit du kva du skriv under på no?

– Veit du?

Stemninga er klart spent og god på rådhuset når leiar i interesselaget for Galeas Gurine, Anders Jordal og kommunedirektør Ragnhild Bjerkvik skal skriva under på avtalen som gjer at «Gurine» blir del av den kulturelle skulesekken.

– Den kulturelle skulesekken er eigentleg eit fylkeskommunalt opplegg som sørgjer for at alle ungar i grunnskulen får vera med og oppleva profesjonell kultur på alle måtar. Alle kommunar har nokre lokale innslag til den kulturelle skulesekken, i Kvinnherad har vi hatt «eg byggar meg ein båt» og «jul i gamle dagar» i samarbeid med Sunnhordland museum, og Merethe Offerdal Tveit har hatt filmkurs. No sit vi altså her og har fått til ein avtale med interesselaget Gurine, om at alle 9.klassinger skal få ta del i den kulturelle skulesekken ein gong i løpet av året med «Gurine», seier Anita Lykkja.

– Eg kan trøysta dykk med at det er veldig stor interesse blant desse 9.klassingane og skulane dei går på, eg har hatt mange telefonsamtalar allereie. Dei lurer på kva tid vi skal starta, kva det går ut på og eg har fortalt litt, men sagt at vi må venta litt til vi har skrive under på avtalen, seier Jordal.

– Men no skjer det! seier Ragnhild Bjerkvik.

– No skjer det! No er det i gang, stemmer Jordal i.

Anders Jordal har jobba med å få til noko liknande heilt sidan dåpsseremonien til «Gurine» i 2019.

– Vi vart opphaveleg lovd eit driftstilskot, og no har vi klart å snika oss inn i den kulturelle skulesekken òg. Dette kjem til å vera fint for ungdommane og lokalsamfunnet. Og ikkje berre indre luten, seier han.

Viktig arbeid

Til stades ved underskrivinga var òg kulturrådgjevar Anita Lykkja, sektorleiar for oppvekst Anne Sofie Kjeka, oppvekstrådgjevar Heidi Solheim og Bjarne Øymyr og Per Ivar Ingebrigtsen frå styret i interesselaget Gurine.

– Dette er stas for oss i Kvinnherad kommune og håper det blir veldig bra for dykk i interesselaget òg, å få til dette. Det har vore veldig kjekt å jobba og samarbeida med dykk om dette, seier Lykkja.

Anders Jordal er veldig nøgd med avtalen, men vil og påpeika at interesselaget har gjort ein fantastisk jobb både med restaurering og drift av «Gurine».

– Vi er jo meir eller mindre overlatne til oss sjølv med å skaffa inntekter. Viss vi samanliknar oss med andre båtar i området og på landsbasis, så slit alle saman med økonomien. Den einaste store forskjellen, og det som reddar oss, er at vi har ein svær gjeng på 20-25 personar som stiller på dugnad på alle desse oppdraga vi har. Alle pengane går til rett i «Gurine». Viss vi skulle hatt eit lønna mannskap hadde vi ikkje kunna eksistert, seier han.

Både kommunen og interesselaget for Gurine er spente på avtalen og gler seg til å ynskja ungane velkommen om bord. Ikkje berre er dette ein avtale som gjer det lettare å kunna drifta «Gurine» vidare, men det gjer òg ein forskjell.

– Frå vår side så er jo dette noko som gir meining. Det finst mange måtar ein kan skaffa inntekter på ei skute, men dette er jo midt i samfunnsoppdraget til «Gurine», seier Bjarne Øymyr.

Fyrste tur

Å segla med «Gurine» vil vera ein del av undervisninga, og 190 9.klassingar vil få vera med på tur. Fyrste tur går fyrstkommande måndag, og Per Ivar Ingebrigtsen har fått æra av å vera skippar.

– Det eg skal gjere no er å ta kontakt med lærarar, høyre om det er nokre spesielle behov blant elevane. Mannskapet skal skaffa seg politiattestar og så skal vi sjekka at alt av utstyr er i orden, tryggleiken er viktig, så vestar og slikt må sjåast gjennom, seier han.

Ingebrigtsen gler seg til tur, og til å laga eit fint opplegg for ungane. Dei to turane neste veke startar i Rosendal, og vêr og vind bestemmer kor hen dei skal.

– Eg har allereie hatt kontakt med lærarar på Øyatun og Husnes, og inntrykket er at dei ikkje interessert i eit veldig detaljert opplegg. Det er viktig å tilpassa turane etter talet timar som dei har fått til å organisera. Det er mange elevar som skal av garde med skulebuss og liknande, så det må passa, seier Jordal.

– Vi har jo ein slags smørbrødliste med aktivitetar som vi kan tilpassa til dei forskjellige klassane, litt utifrå vêr, føreforhold, kor kaldt det er i sjøen og likande, seier Bjarne Øymyr.

«Gurine» skal gå opp til dei forskjellige skulane for å henta elevane, så det sparer skulane for skyss.

Praktisk erfaring

– Det som gler meg aller mest er at dei elevane som vanlegvis tilbringar mange timar på skulebenken, no skal få komma ut i ein meir praksisorientert kvardag. Det blir veldig kjekt og eg trur det er mange elevar som gler seg til det, seier kommunerådgjevar Ragnhild Bjerkvik.

Kystkulturen har vore ein del av Kvinnherad i alle år. Diverre (eller heldigvis?) er det no slik at ein ikkje treng båt for å komma seg rundt over alt lengre, og mykje av kunnskapen og tradisjonane vi har hatt i kommunen står i fare for å gå tapt.

– Det har vore veldig viktig for oss, reint fagleg, dette med kystkulturen. Det er ein så sterk tradisjon her i Sunnhordland. Dei som veks opp no treng både erfaring og praksis i det å fiska og segla og gjere seg nytte av fjorden som framkomstveg og ikkje minst for mat, seier Anne Sofie Kjeka.

Då «Gurine» arrangerte sommarskule i 2021, fekk mannskapet seg ei aha-oppleving. Dei såg kva det betydde for ungdommane å meistra praktiske ting, og Jordal er glad for at dette no blir ein del av opplæringa i kommunen.

– Vi skal heisa ungane ekstra langt opp i masta slik at dei hugsar dette for resten av livet, seier han.