– Grunneigar bestemmer kor lenge

Planleggjar ved samfunnsutvikling i Kvinnherad kommune Anne Lise Næs presiserer dette i familien Tjomsland Eik si sak:

– Føresegnene stadfester slik dei ligg føre, at fram til kjøp/overtaking av eigedommane, så kan dagens grunneigar bruke eigedom, bygg og anlegg som i dag. Det er ingen som må flytta ut, og det er føresett at grunneigarar bestemmer kor lenge dei vil bu på desse eigedommane. Det er likevel lagt til grunn at eventuell nye byggetiltak innanfor dette arealføremålet skal vera i tråd med næringsføremålet. Føresegna er utforma slik som dette for å trygga grunneigarane på dette. Det er ikkje slik at familien Tjomsland Eik må finna seg ein ny stad å bu innan 3 år, men på sikt er det ønskjeleg å nytte desse eigedommane til næringsføremål jf. utdrag frå planskildringa under:

BN11 regulerer to eksisterande bustadeigedomar, som i planforslaget er regulert til næring. Bustadeigedomane er i gjeldande reguleringsplan regulert til industri. Dei vart ikkje innløyste, og er framleis nytta til bustadføremål. Ved utarbeiding av kommuneplan for Kvinnherad 2016-2026 vart desse to eigedomane synt som bustad. Det er no føreteke ei ny vurdering av desse to bustadeigedomane, og det er ut i frå plassering og nærleik til næringsverksemdene i området vurdert at det ikkje er tilrådeleg med bustadføremål i dette området. Ein vurderer at det kan med tida skapa for store konfliktar, og helsemessige dårlege løysingar for bebuarar. Planforslaget gir kommunen rett til ekspropriasjon av eigedomane, men kommunen ynskjer som utgangspunkt dialog før dette verkemiddelet vert teke i bruk. Eigedomane kan nyttast til bustadføremål fram til kjøp/overtaking, og eksisterande avkøyringar til bustadtomtene kan nyttast fram til at areala vert nytta til næringsføremål. Føresegnene stenger for all utvikling av eigedomane til bustadføremål, noko som er negativt for desse eigedomane. Ved bruk til næringsføremål skal dette arealet planerast på kote +10-11 med maks byggehøgd på 9 meter og utnyttingsgrad 50% (1240 kvadratmeter).

– Vil dei vel

Me vil likevel at grunneigarane her skal vera trygge på at dei kan ta den tid dei treng.

Me har forståing for at dette er ein særs ugrei situasjonen vera i, men denne måten me løyser dette på, er ei vidareføring av reglane i den gamle reguleringsplanen. Me forstår det også kan gå på tryggleiken laus, men i planprosessen er det vurdert at det er best for både grunneigarane som bur på Børnes, og næringsområdet i heilskap, at ein finn ei betre løysing. Dette også med folkehelse i fokus. Me ynsker ikkje helsemessige dårlege løysingar for bebuarane i kommunen vår, og me er redd det på sikt kan bli utfordringar å bu midt inne i eit næringsområde. Me vil dei vel, og det treng dei ikkje å lure på!

Når det gjeld informasjon kring planarbeidet, så vart planarbeidet sendt til alle grunneigarane i samband med offentleg ettersyn 17. juni 2020. Posten blir sendt via Altinn, men post som ikkje vert opna i Altinn, vert ettersendt i posten som brev. Me håpar og trur at desse grunneigarane då skal ha motteke sendinga vår.

Etter dette så kommunen arbeidd med plandokumenta som me no har lagt fram til politisk behandling for godkjenning.

Når det gjeld gang- og sykkelveg på andre sida av fylkesvegen, så vil det måtte gå litt areal frå tilgrensande eigedommar for å få dette til. Dette er for at alle som bur i området kan kome seg trygt til og frå planlagt busstopp. Dette håpar me tenar dei alle til gode, avsluttar Anne Lise Næs.