Grøn storsatsing på kaikanten

Med kake, kaffi og ordførartale kunne Magnar Hellesøy markera at Green Ship Design er oppe og går i Rosendal.

Frå lokala der Gullsmed Eide heldt til fram til midten av august håper Green Ship Design å finna gull i ein grøn skipsmarknad. Tysdag markerte dei etableringa av hovudkontor i Rosendal, og nytta samstundes høvet til å presentera laget som skal gjera visjonane til realitetar.

I Grenda i førre veke omtala me planane til Magnar Hellesøy, der visjonen er å byggja to 90 meter lange katamaranar som skal frakta fersk laks frå Vestlandet til Rotterdam på 18 timar.

– Grønt skifte

Samstundes som Hellesøy ynskte velkommen til opning av Green Ships Design sitt kontor i Kvinnherad, var det også dags for å presentera nokon av nøkkelpersonane Hellesøy skal ha med seg. Halsnøybuen Dag Robert Jakobsen blir leiar i Green Ship Trading, som er selskapet som skal henta skroga inn til landet. Jan Evald Såtendal blir salssjef.

– Folk har sagt eg er sprø som har slutta i jobben eg hadde for å bli med på dette, men lukkast me, så kan dette bli veldig stort. Og eg har stor tru på dette, meiner Såtendal.

Hellesøy hadde også med seg Lemuel Kruger, styreleiar Thomas Epland og Sigurd Edvard Steen i tillegg til kvinnheringane.

Ordførar Hans Inge Myrvold nytta høvet til å gratulera og trekkja lange linjer.

– Å stå samla her på bryggekanten er litt symbolsk. At Kvinnherad, med Green Ships Design i tet, tar kommandoen i utviklinga av dei nye løysingane. Mange spør oss «Kva er det grøne skiftet?». Dette er etter mitt skjøn i største grad eit symbol på eit grønt skifte, sa ordføraren under opninga.

Spesielt peika han på at ein bevegar seg frå det tradisjonelle transporten langs vegen, og inn på sjøvegen med grøn framdrift,

– Dette er eit internasjonalt prosjekt, meinte han, og lova at kommunen skulle bidra sterkt inn på dei arenaane dei kan og der det er naturleg.

– Me skal leggja til rette for at du Magnar skal få din forretningsidé fram for dei rette fora, sa Myrvold.

Også næringssjef Grete Solheim helsa nyetableringa velkommen, og lova å hjelpa han med å navigera i jungelen av ordningar det er råd å søkja om når ein har eit innovativt konsept.

Hydrogen

Knut Førland frå Liquiline har vore i samtalar med Green Ship Design i fleire månader allereie, og ser stort potensial i eit prosjekt som dette.

– Dette prosjektet kan løfta opp ein produksjon av hydrogen i Norge, og gjerne i Kvinnherad. Me har akkurat fått eit utviklingstilskot for å utvikla eit prosjekt som skal munna ut i eit hydrogenanlegg i tilknyting til eit kraftanlegg i Kvinnherad. Eg kan ikkje vera spesifikk om kva kraftanlegg det er snakk om, men me ser på fleire prosjekt, sa Førland i samband med opninga.

Utfordringa i dag er at det ikkje er eit kundegrunnlag i Norge til å starta opp produksjon av hydrogen.

– Ein har ein «høna og egget»-situasjon her. Kven skal koma først? Grøn framdrift på så store skip er ikkje råd med batteri, det vil bli for tungt. Då er hydrogen det einaste utsleppsfrie alternativet. Katamaranane på hydrogendrift blir i så fall det første prosjektet i Norge som er ein stor nok forbrukar til at dette kan koma i produksjon, la Førland til.

Blant dei som var til stades under opninga, var Thorleif J. Hellesøy. Den tidlegare ordføraren er far til Magnar, og var styreleiaren i selskapet i halvanna år. Eit lårhalsbrot for seks veker sidan var ikkje nok til å halda han borte frå kaikanten denne solskinstysdagen.