Grøn Næringspark nærmar seg politisk behandling

Etablering av selskap, med aksjonæravtale, og erverv av areal, er noko av det Solheim varsla kjem på sakskartet snart.

Vidare blir bygging av infrastruktur og styrking av kapital til selskapet prioriterte felt.

– Dette er kapitalkrevjande, understreka Solheim, som fortalte at reguleringsplanen snart klar til å senda ut på høyring.

Kaiareal

– Det eg skal presentera vil krevja energi, ein energi eg forutset at me har. Ein vil trenga effekt på 300 MW, men det kan gje over 230 arbeidsplassar og kan betyr over seks milliardar kroner investert, sa Solheim.

Når det gjer erverv av areal på næringsparken, så avslørte Solheim at dei har fått tilbod om kjøp av sjøareal.

– Hydro treng kaiarealet dei har, men me har fått tilbod om eit anna, som er regulert til kai. Me har vurdert at det kan bli lett å få tak i stein, om det blir utbyggingar i Fjellhaugen og/eller Mauranger, men det er eit opnare spørsmål no enn for to veker sidan, sa Solheim

Ny veg frå Husnes-sida og mot den grøne næringsparken stod også på ønskelista.

– Det hadde vore bra å få, slik at dei som skal på jobb sleppa å køyra så langt for å koma til krysset, sa Solheim, og viste til at ein slik det er no må heilt til krysset i nord enden av Stripo før ein kjem seg inn til næringsparken.

Ho opplyste at opsjonsavtalen med Hardanger Biogass er forlenga til 31.12.2022.

– Biogass interessant fordi dette er i Kvinnherad, med jordbruk og havbruk. Me har vore på studietur til biogassanlegget på Eldøyane på Stord, og eg kjente ikkje noko lukt på vårt besøk, sa næringssjefen med referanse til uroa som framtidige naboar til anlegget har lufta.

Nærvarme

Sjølv om det ikkje var direkte knytt til Grøn Næringspark, refererte Solheim til eit nærvarmeprosjekt som er under forprosjektering i Ølve. Herde Kompositt og Kvinnherad kommune gjer ei utgreiing på om det kan vera aktuelt å skilja ut varmesentralen ved Herde sin fabrikk i Ølve til eit nærvarmeanlegg. Tanken er då å etablera eit energiselskap for varmeproduksjon og energidistribusjon i industriparken som er under etablering i Ølve.

– Dette kan det vera stor overføringsverdi i for andre, om me er med på ei reise på dette feltet. Søknad sendt til Enova, men me har ikkje forplikta oss til noko enno, opplyste Solheim

Satsing

Ove Lemicka såg med ambisiøse briller på det Solheim presenterte.

– Skal me møta framtida, må me satsa offensivt. Det er ei stor og krevjande satsing, å finna gode aktørar og investorar er viktig. Ein treng nokon med kapital som kan vera med å løfta parken. Me må ha på plass kapital nok til at dette kan jobbast godt nok med. Det trengs ei stor nok satsing til at det ikkje blir eit venstrehandsarbeid for nokon, meinte Lemicka (Frp).

Leif Sverre Enes (H) refererte til sitt besøk i Høylandsbygd i førre veke.

– Det er store ting på gang der. Tronds Marine har allereie gjort ein del, og og har store planar vidare. Politikargruppa som jobbar med Børnes jobba godt saman med aktørane der, og sendt det over til planavdelinga. I Sandvikslio er det ei gruppe som syslar med gjenvinningsanlegg for avfall, og det er ny aktivitet på Åsnes i Norsafe-området, samt på vårt eige næringsareal på Årsnes. Me har ein del, i tillegg til det som kjem på Husnes, oppsummerte han.

Gaute Lund (SF) såg ikkje for seg kven desse samarbeidspartnarane skal vera når ein tar investeringsavgjerdene.

– Kvinnherad kommune må inn og gjera dette, trur eg, viss me skal få infrastrukturen på plass, vurderte han.

Grete Solheim slo fast at ho ikkje nødvendigvis kan seia for mykje før ein har signert noko.

– Du vil nok sjå det når saka kjem til handsaming. Kvinnherad kommune må truleg ta eit stort løft for å få etablert selskapet i første omgang, men eg er trygg på at me kjem til å få fleire samarbeidspartnarar med oss, slutta Solheim.