Gravide bør ta to dosar koronavaksine

Gravide har ein auka sjanse for alvorleg sjukdom som følgje av covid-19. FHI anbefaler difor gravide om å beskytta seg ved å ta to dosar koronavaksine.

Etter ei nøye vurdering av effekt og sikkerheit av koronavaksine, utvida FHI i august si anbefaling om vaksinering i svangerskapet til å gjelda for alle gravide. Bakgrunnen for anbefalinga er å beskytta mor og den nyfødde mot alvorleg koronasjukdom.

Førebelse tal frå Storbritannia på covid-19 i svangerskapet, viser at meir enn 98 prosent av gravide kvinner som hadde symptom på covid-19 og trengte innlegging, var uvaksinerte. Av 235 gravide kvinne som fekk intensivbehandling på sjukehus, var 232 uvaksinerte, berre tre av dei hadde fått éi dose med koronavaksine, og ingen hadde fått to dosar.

– Dette gir eit tydeleg bilete på kor viktig det er at gravide beskyttar seg mot koronasjukdom, og at dei fullvaksinerer seg anten før eller undervegs i svangerskapet, seier barne- og overlege Margrethe Greve-Isdahl ved FHI i ei pressemelding.

I Norge i dag ser det ut til at sju av ti gravide er vaksinert, kor ein av ti er vaksinert før graviditeten og nærmare seks av ti er vaksinert under graviditeten.

– Det er gledeleg å sjå at mange gravide har takka ja til tilbod om koronavaksinasjon under svangerskapet. Ettersom gravide har ein høgare sjanse for alvorleg sjukdom dersom dei vert smitta, er det spesielt viktig at dei har god beskyttelse ved at dei er vaksinert, seier Greve-Isdal.