Godt resultat, store prisvariasjonar og meir vindkraft
Energigiganten Eviny fekk eit underliggjande resultat på 470 millionar kroner i fyrste kvartal. Det er 115 mill. lågare enn same kvartal i fjor, noko som i hovudsak skuldast lågare kraftprisar.
Publisert
– Vi har lagt bak oss eit kvartal med historisk store svingingar i kraftprisen, der vi også opplevde negative prisar. Ved å leggja produksjonen av vasskraft til gunstige periodar og unngå dei dårlege, har vi slått marknadsprisen med over ti prosent. Vi har eit dyktig tverrfagleg vasskraftmiljø som jobbar målretta med styring av produksjon og fysisk kraftsal for å utnytta den fleksible vasskrafta vår best mogleg, seier Eviny sin konsernsjef Ragnhild Janbu Fresvik i ei pressemelding.
Prisen
Annonse
Eviny opplyser at gjennomsnittsprisen for kraft levert i Vest-Norge (NO5) falt frå 108 til 66 euro/MWh mellom fyrste kvartal 2023 og fyrste kvartal 2024. Eviny oppnådde ein snittpris på 73 euro/MWh i NO5 i fyrste kvartal i år, altså 7 euro over marknaden. Meirverdien utgjer 165 millionar kroner,
Netto vasskraftproduksjon i fyrste kvartal vart på 2,1 TWh, som er om lag 0,1 TWh høgare enn same periode i fjor. Vasskraft står for heile 85,1 prosent av resultatet til Eviny desse tre månadane.
Meir vindkraft
I fyrste kvartal kjøpte Eviny sine to fyrste vindkraftverk, Tellenes og Guleslettene. Kraftverka vart formelt overdregne 27. februar, og dette er såleis fyrste kvartalet der vindkraft inngår i kraftproduksjonen til selskapet. Produksjonen for Eviny vart 150 GWh, og netto driftsinntekter frå vindkraftproduksjon i fyrste kvartal utgjer 102 millionar kroner.
Annonse
– Dette er gode vindkraftverk der vi ser moglegheiter for utvidingar. Det vil kunne gje meir velferd og arbeidsplassar lokalt, seier Fresvik.
På Guleslettene har Eviny informert vertskommunane Bremanger og Kinn om planar for 20 nye vindturbinar. Selskapet opplyser at det skal gje 350 GWh ny produksjon og tilføra kommunane 8 millionar kroner i auka eigedomsskatt og 8 millionar i produksjonsavgift årleg.
Eviny produserer energi frå 39 vasskraftverk og to vindkraftverk på Vestlandet. dotterselskapet BKK frakter straum til 450.000 vestlendingar i 19 kommunar. Eviny er eigd av 17 vestlandskommunar, deriblant Kvinnherad, samt Statkraft og to lokale kraft- og elektrisitetslag.
