– Godt resultat i ein utfordrande marknadssituasjon

– Det er ikkje lenger noko nytt at marknaden for produkta våre er krevjande grunna lågare aktivitet framfor alt i den europeiske bil- og byggjeindustrien. Men takka vera gode prisar og svak krone er innteninga god, sjølv om etterspurnaden etter pressbolt er lågare. Det gir eit bra resultat for Hydro Husnes etter forholda, seier fabrikksjef Jon Ola Ystgaard i ei pressemelding i samband med kvartalsresultatet deira.

Kvartalsresultatet er på 365 millionar kroner, medan det samla for 2024 er på 876 millionar kroner. Så langt i år har Hydro Husnes notert inntekter på 4.028 millionar kroner.

I meldinga peikar dei på den svake kronekursen og generelt gode prisar på aluminium som eit stort bidrag til eit godt kvartalsresultat for Hydro Husnes. Dette skjer trass i ein utfordrande marknadssituasjonen, som gjer at verket held fram med å produsera med redusert kapasitet.

Fokus på tryggleik

– Fråvær av personskadar ved verket held fram. Ein hadde ikkje skadar med fråvær i fjor, og har ikkje hatt nokon hittil i år heller, går det fram av pressemeldinga.

Der kjem det fram at dette på ingen måte kjem av seg sjølv, og at det blir terpa på tryggleik og beredskap kvar einaste dag.

– Effekten av det ser vi når det ein sjeldan gong oppstår uventa situasjonar, uttalar fabrikksjefen, og viser til situasjonen som oppstod då såkalla utrenning frå to støypeomnar på same tid sette støyperiet ut av spel, med potensielt store konsekvensar for produksjonen.

– Det er under ei usannsynleg hending som denne ein ser kva folka våre er gode for. Takka vera kompetansen og roa til ekspertane våre på Husnes og i heile Hydro-apparatet, var drifta snart tilbake til normalen. Eg er utruleg stolt over korleis organisasjonen vår er rusta til å løyse kompliserte utfordringar og halda hjula i gang utan å sette tryggleiken på spel, seier Ystgaard i meldinga.

Kraftsituasjonen

I det langsiktige biletet er etterspurnaden etter aluminium venta å auka dei neste ti åra. Ystgaard meiner at Hydro er godt posisjonert, men påpeikar at Hydro og annan kraftforedlande industri har særleg ei hovudutfordring i åra som kjem: Mange av Hydro sine langsiktige kraftkontraktar går ut etter 2030.

– Det er alvor i kraftsituasjonen for Hydro og andre industriaktørar. Me inngår nye kontraktar der me kan, jobbar med oppgradering av vasskrafta og har fleire prosjekt for energi-effektivisering på gang, men sjølv om me snur alle steinar er ikkje det nok. Me må byggja meir fornybar kraft i Noreg for å sikre industrien vi har i dag, sluttar Ystgaard.