Godt fyrste år - omsette for 85 mill.

Settefiskanlegget Ænes inkubator AS, som kvartetten Eide Fjordbruk, Lingalaks, Tombre Fiskeanlegg og Quatro Laks står bak, har levert inn rekneskapar sidan 2018. Men dei fyrste fem åra var alle utan inntekter, noko som ikkje kan seiast å vera gunstig for økonomien. Dette førde naturleg nok til store underskot; 5,7 mill. i 2020, deretter 6,2 mill. i 2021 og heile 22,7 mill. i 2022.

Men i 2023 ser det veldig annleis ut, for det var det fyrste heile driftsåret. Selskapet noterte då inntekter på 85,4 millionar kroner. Alt kjem frå sal av smolt i Norge. Driftsresultatet vart på 29,0 millionar, medan årsresultatet enda på pluss 4,4 millionar.

Det kan elles nemnast at Ænes inkubator ved nyttår hadde ei langsiktig gjeld på 489 millionar kroner og ei kortsiktig gjeld på 159 mill.

Langt høgare

Byggjestart for settefiskanlegget var i oktober 2020. Utbygginga kosta i alt kring 750 millionar kroner. Dei fyrste rogna kom på plass i mai 2022, og i juni 2023 vart det invitert til storstila offisiell opning. Målet er å produsera 20 millionar sjøklar settefisk årleg, tilsvarande 3.000 tonn. Dette er også grensa for kva anlegget har løyve til.

Dagleg leiar Jan Gunnar Strand forventar at rekneskapen skal bli endå betre for 2024.

– I fjor var vi i startgropa på anlegget, og hadde då så vidt byrja å koma i full drift. Vi produserer no settefisk jamt og trutt, og forventar å koma langt høgare i resultat framover. Dette ser vi allereie at vi vil gjera. Noko meir om dei tala kan eg ikkje seia enno, fortel Strand til nettavisa Kyst.no.

Flinke sommarvikarar

Selskapet har no 25 fast tilsette. I sommar har dei fått hjelp av ti vikarar.

– Desse ungdomane har gjort ein veldig god jobb, og er folk som vi seinare ynskjer å kunna rekruttera til fast tilsetjing. Aldersspennet på anlegget har vore frå 72 år og heilt ned til 16-17-åringer, seier Strand.