– Godt å vera norsk i Danmark

– Det er jo det på ekta. Det er det landet utanom Norge der dei aller fleste bøkene mine kjem ut, seier han med smil i stemma.

Skrønemakar

Det heile starta med at agenturet Northern Stories tok kontakt då boka «Til jord skal du bli» kom ut, med ynskje om å forvalta rettane til den.

– Dette enda opp med å bli eit svært fruktbart samarbeid, med sal av både filmrettar og bøker til andre land på kort tid. Northern Stories jobbar berre med sal av rettar, der dei vel både kva forfattarar og titlar dei har tru på. No nyleg har dei også bygd opp ei barne- og ungdomssatsting. I den prosessen har dei fått heile min katalog inn også, forklarer Totland.

– Då tek dei med seg fleire titlar på messer rundt om i verda som dei då kan løfta fram. Dei har stor interesse for at alt eg skriv skal gjere det så bra som mogeleg på den internasjonale marknaden. Så no sit nokon å jobbar med å få heile min forfattarskap ut i verda, fortset han.

Ein anna ting som skjedde då boka «Til jord skal du bli» kom ut, var at filmrettane til boka vart seld.

– Status der er at dei brukte fjoråret på å skriva filmmanuset, no jobbar dei så vidt eg veit med finansiering. Det er framleis litt surrealistisk, tanken på å skulle gå inn i ein kinosal og sjå desse folka som eg har funne på. Eg innser at eg er sjukt privilegert som kan leva av å finna opp historier. Eg er blitt ein profesjonell skrønemakar, og det er fint, fortel han.

Ikkje sympatisk

Fyrste boka «Til jord skal du bli», i det som no ligg an til å bli ein liten trilogi, blei utan tvil ein stor suksess. No kjem altså oppfylgjaren ut med tittelen «Til døden skil oss».

– Eg vil sei at det er ein frittståande oppfylgjar med same hovudperson og same type humor og mørk drama som i den fyrste boka. Historien fortset eit halvt år etterpå, og for dei som har lest den fyrste vil kjenna igjen mykje, forklarer han.

– Eg hadde eigentleg aldri tenkt til å laga ein oppfylgjar, men då eg i fjor jobba med filmmanuset, så var eg allereie inni verda der. Når eg då prøvde å skriva andre bøker samstundes, så enda eg berre opp med å skriva om liknande folk. Då tenkte eg at eg heller gjer eit forsøk, men at eg ikkje kom til å gje ho ut dersom ho ikkje vart like bra, fortset han.

Forfattaren innrømmer også at desse to bøkene er dei einaste bøkene der han ler sjølv medan han skriv.

– For min del er det eit prosjekt, men det er planlagt at det skal koma fleire bøker. Dette er noko av det aller gøyaste eg driv med, det å skriva desse to bøkene. Dei er lystbetonte og dei einaste der eg ler når eg skriv, ler Totland.

– Det er kanskje ikkje så sympatisk, men målet mitt er at gleda frå å skriva skal smitta over på lesaren. Det funka i den fyrste boka, legg han til.

Kvikk Lunsj

Oppfylgjaren «Til døden skil oss» er allereie ferdig, og er venta å finna hjå næraste bokhandlar i august. Men det er absolutt ikkje det einaste prosjektet den travle forfattaren har på gang.

– Eg reknar med at det kjem ei ny barnebok rett etter nyttår. Eg jobbar også litt med ei tredje Jacob Juul-bok. Den er framleis litt meir oppe i det blå endå, men det hadde vore veldig gøy dersom den kom ut til påska 2026, poengterer han.

– Kvifor akkurat då?

– Jo, for no har eg allereie er raud bok, den neste blir grøn. Viss det då kjem ei gul bok i påska, så vil alle tre bøkene se ut som Kvikk Lunsj-sjokoladen når dei ligg oppå kvarandre, avsluttar Totland lattermild.