Gode tilbakemeldingar etter båtbyggjedagen i Ølve
– Me var usikre på kor mange som ville koma sidan det var meldt ruskevêr og trudde gjerne me måtte eta lapskaus til middag i fleire dagar etterpå, men alt for ut! fortel Lars Nerhus i arrangørkomiteen nøgd.
Publisert
Sist oppdatert
Noko av nervøsiteten gjekk ut på at det var ruskevêr og fjæra sjø, noko som kunne by på utfordringar då jakta Mathilde skulle leggja til kai ved staden der ho vart bygd og sjøsett i 1884.
– Det var ein god skipper på Mathilde. Han la veldig fint til, så det gjekk heldigvis veldig bra, fortel Nerhus.
Annonse
Arrangementet gjekk føre seg i den nye sjøbua til Hans Jakob Berge, i Haktorsverftet og i Saga, samt utomhus og på kaien, søndag 21. august.
– Me hadde laga til basseng utanføre der barna hadde det veldig kjekt med båtane dei bygde. Tenåringane i bygda hjelpte elles til med arrangementet, og dei gjorde ein flott innsats, skryt Nerhus vidare.
Godt besøk
Om lag 150 personar i alle aldrar, og frå fleire omkringliggjande kommunar, fann vegen til Øyra på Nerhus denne dagen.
Annonse
Lapskaus-bestillinga til gildet var rekna for 80 personar, og då det var minst 80 personar som slo søndagsmiddagen i lag med inntaket av båtkultur og frisk sjøluft, trengte heldigvis ikkje kulturnemnda i Ølve Bygdelag å eta restar i dagane som følgde. I tillegg var det sal av kaffi og bakst i kafeen.
Programmet, som var snikra i hop etter to år utan båtbyggjedag, fekk stor skryt frå publikum. Både føredraget med Jørn Øyrehagen Sunde og konserten med Fotefar vart godt motteke.
– Det var veldig populært, det fekk me mange positive tilbakemeldingar på, sluttar Nerhus nøgd.
