Gode tal for KVV

– Fyrst og fremst så vil eg påpeika at dette framleis berre er prognosar, fyrst i juli etter at elevane er blitt tekne inn vil me sjå dei faktiske tala. Så langt derimot har søkjartala vore gode, og det ser ut til at me får fylt opp klassane våre, fortel assisterande rektor Gry Hege Grønningen.

– No er me så heldige at me ikkje har noko særleg med lekkasjar til andre skular. Til dømes så har jo både Fitjar, Bømlo og Stord vidaregåande skular, så der er konkurransen om elevane litt større. Hjå oss er det kanskje berre fem -ti prosent av elevane som fer til andre skular, då fordi dei vel ei linje som me ikkje har, fortset ho.

Sårbart

Grønningen fortel at det hjå dei er yrkesfag som er størst, men at dei i år også ser ein auke i søkjarar til helse- og oppvekstfag. Dette meiner Grønningen i stor grad skuldast kommunen sin innsats.

– Sjølv om dei vidaregåande skulane høyrer til under fylket, så er samarbeidet med kommunen veldig godt. Politikarane tek kontakt og inviterer seg på besøk, noko som gjer at dei då får eit innblikk i korleis vidaregåande skule fungerer og då på ein mykje betre måte kan fronta vår sak. Til dømes dette med at kommunen gjekk inn og garanterte lærlingplassar for helse og oppvekst. Dei har eit stort behov for den arbeidskrafta. Så det er veldig bra, understrekar ho.

På spørsmål om dei vurderer å starta opp nokre nye linjer, er den assisterande rektoren klar på at sjølv om det er noko som dukkar opp frå tid til annan, så er det ei samansett problemstilling.

– Når me får innspel på nye linjer, så kan det gå på kostnad av dei linjene me har. Fordi me har 350 søkjarar og dei skal fordelast på dei programområda me har, så dersom me får fleire programområde så blir det færre søkjarar på kvart område. Då er det sårbart viss det blir for få søkjarar på enkelte linjer, noko som kan føra til at dei på sikt må leggjast ned grunna lavt søkjartal, forklarer Grønningen.

– Me blir målt på oppfyllingsgraden vår, og det er det me får økonomi utifrå. I fjor til dømes så hadde me låg søknad på vg1 helse- og oppvekstfag, då dei berre var 15. Når dei så skal opp på vg2 skal dei fordelast på to klassar. Då blir det 5-6 i den eine og 7-8 i den andre. Der har me myndigheit til å seia at dette vil me oppretthalda, fordi me veit at det kjem eit større kull til neste år. Då får me berre økonomi til ein halv klasse, fordi det er det me har, men kostnadane er likevel som ved ein full klasse, fortset ho.

E-sport og oppdrett

Likevel har dei nokre spanande idear i emning.

– Vår strategi er å sjå på kva næringslivet i Kvinnherad treng, og sjå om det er noko me kan knyta til linjene me har. Til dømes det med oppdrettsnæringa, det kan kanskje knytast opp til teknologi- og industrifag. Det er jo anlegg som skal vedlikehaldast, så då kan me jo kanskje få det inn som eit delfag der, fortel Grønningen.

– På idrett til dømes, veit me at dette med e-sport er blitt ein ting og det er noko me jobbar med. Trio har jo vore veldig på og dei leiger faktisk hjå oss no i dag. Der tenkjer me på korleis kan me nytta oss av det og korleis kan me få ha e-sport som ein del av breiddeidretten, legg ho til.

Det er ikkje berre på hovudskulen ein kan skilta med gode søkjartal, også tilbodet ved Valekrossen gjer det svært godt.

– For nokre år sidan stod tilbodet ved Valekrossen i fare for å leggja ned, men dei siste åra har dei jobba godt med å profilera seg, noko som har gjeve gode resultat. Så dei ligg veldig bra an og er vel så fullt som lokala tilseier, forklarer Grønningen.

– Valekrossen tek inn på særskilde vilkår, og tek inn heile året etter behov. Enn så lenge så får framleis alle som ynskjer det plass, men det er viktig å hugse på at gruppene her ikkje skal verta for store. Desse elevane har behov for og skal ha mindre forhold enn ved til dømes KVV, legg Grønningen til.

Avslutningsvis kan den assisterande rektoren forsikra om gode søkjartal og så godt som fulle klassar. Likevel ser ho nokre mørke skyer lenger framme i horisonten.

– Elevtala går jo nedover, ikkje berre her men i heile landet, og det vil me også merka etter kvart. Men enn så lenge står me ikkje i fare for å leggja ned noko som helst, avsluttar ho.