Gode resultat for Halsnøy J14 i Bergen fotballcup
Halsnøy J14 vart puljevinnarar på fredag, etter å ha vunne over Flaktveit, Vaksdal og Loddefjord i Bergen fotballcup. Sjølv om håpet var å nå finalen, er dei nøgde med innsatsen.
Publisert
Sist oppdatert
Jentene enda til slutt på ein delt 3. plass, men understreka med godt spel at dei var på høgde med dei beste. Med 1-0 sigeren over Loddefjord i første pulje vart Halsnøy-jentene dei einaste som klarte å hevda seg mot vinnaren gjennom heile cupen.
– Me er veldig glade for at me reiste, og i dag er nok jentene nøgde med å ha kome så langt, sjølv om det var ein del som var lei seg då dei rauk ut, fortel Christine Solheim Fjelland, ein av trenarane til laget. Med seg i trenarteamet har ho Jenny Alver.
Annonse
J14-laget hadde 13 ivrige spelarar på laget, men etter mange gode kampar mangla det sprut i beina til å hamla opp med dei beste i semifinalen. Det vart til sist Loddefjord og Fyllingsdalen som kjempa om førsteplassen, kor førstnemnde vart sterkast.
Trass i auka smitte i Bergen kjendes opplegget veldig trygt.
– Me hadde minibuss med oss og budde på hotell. Det har vore så travelt at me ikkje har hatt tid til å gjera noko anna enn å eta og kvila, fortel Solheim Fjelland, og legg til at opplevinga samla sett var svært positiv.
