Gode prestasjonar av unge gokart-talent frå Husnes
Denne helga gjekk første runde i Vestlandsmeisterskapen i gokart av stabelen hos NMK Bergen på Eikås. To unge førarar frå Kvinnherad deltok, Mathias og Mathea Teigen, og begge køyrte inn til svært akseptable plassar på ein krevjande bane.
Publisert
Vestlandsmeisterskapen i gokart går over fire rundar. Den første vart halde i helga som var. Totalt stilte 75 pilotar til start, fordelt på åtte ulike klassar. Fleire av dei unge deltakarane som køyrde for NMK Haugaland testa ut banen på Eikås for første gong.
Kjempa mot junioreliten
Annonse
Mathias (12) stilte i Jr 125, på det som var hans første møte med banen på Eikås i stor kart. Han køyrde inn til ein god 6. plass i denne første runden av VM.
– For hans del går det i motorsport 24 timar i døgnet, så dette gav meirsmak. Han har køyrd to løp tidlegare, men her fann han ikkje heilt flyten. Men han møtte hard motstand, for det var høgt nivå i junior-klassen. Det kom folk frå heile landet, og fem av dei beste i norgeseliten stilte til start, seier Ronny Teigen, som stod på sidelinja og følgte med.
Solid debut
Mathea (9) stilte i Cadetti-klassen. I den køyrde ho inn til ein 7. plass, noko som var eit godt resultat mot sterke bergensarar på heimebane. Det var første gong den unge piloten deltok i eit løp, og det var også hennar første møte med Eikås-banen.
Annonse
– Ho var faktisk oppe på sida av 4. plassen, og ho låg lenge på 5. plass. Litt skuffa etterpå, men alt i alt vart det bra, fortel Teigen imponert, og legg til at løpet gav meirsmak for begge to.
Høg puls frå sidelinja
Ronny Teigen oppsummerer opplevinga som god.
– Det var eit flott arrangement som gjekk på skinner, men det var ein krevjande bane som gav mykje juling på både pilot og kart. Det vart mykje puls. Kona mi Silje hadde på seg pulsklokke, og ho var oppe i 120 i puls sikkert ti gongar gjennom løpet, fortel han.
Det var med andre ord spanande å følgja med frå sidelinja.
Dei fram til å delta på heimebane i Haugesund 20. august. Då reknar Teigen med at Mathias og Mathea får følgje av fleire unge motorsport-entusiastar frå Kvinnherad, når 3. runde av Vestlandsmeisterskapen går av stabelen.
