Gode historier på eldredagen

Med ei fin historie frå Lars Amund Vaage, latter og song, feira dei eldre seg sjølv under eldredagen i kulturhuset på Husnes torsdag ettermiddag.

180 eldre møtte opp på feiringa og fekk servert god underhaldning frå scena. Det heile opna med ei tilsendt helsing frå Synnøve Solbakken, der ho nytta anledninga til å takk for sin periode som ordførar og inviterte alle til museumsdag på Valen sjukehus.

Etter det entra leiar i eldrerådet, Kristian Hus, scena. Han tok opp problemstillingar som dei eldre møter i kvardagen, og sette fokus på utfordringane kommunen står ovanfor med det aukande talet på eldre.

 

Musikk og mat

Høgdepunktet kom då Lars Amund Vaage fortalte ei interessant og rørande historie om bestefaren Ragnvald Vaage. Diktaren og arbeidsmanen som i enkle kår heime på Kjørve, slo seg opp til å bli den respekterte diktaren han er i dag. Med bristande stemme las han òg opp dikt der Ragnvald skildra barndommen. Historia skapte latter og tårer frå både publikum og forteljaren sjølv.

Etter det fekk det frammøtte servert musikk frå duoen Tvisynt, og metta magen med svinefilet og grønsaker. Kristian Bringedal var godt nøgd med måten dagen vart markert på.

– Eldredagen er ein internasjonal markeringsdag, ei høgtid og ei feiring. Og det var ein vellukka fest på alle måtar, seier han.