God start på året for Hydro Husnes

Trass svakare etterspørsel etter aluminium, blei det eit godt første kvartal for Hydro Husnes.

– Aluminiumsmarknadane er framleis urolege, men me ser at kombinasjonen av dei tiltaka me gjorde hausten 2022, samt betringar i marknaden, gjer at produktlagra våre har blitt monaleg lågare. God drift, gode priser på aluminiumsprodukta me leverer, svak krone og sal av overskotskraft sikra ein sterk opning på året, seier fabrikksjef Jon Ola Ystgaard i ei pressemelding i samband med kvartalsresultatet.

Modernisering

Ystgård peikar på at då deler av produksjonen blei midlertidig tatt ned før jul grunna den usikre marknadssituasjonen, sette Hydro Husnes i gang med prosjekt for å modernisera anlegget.

– Det er gledeleg at me har sjansen til å bruke ein periode med lågare aktivitet til å utvikla aluminiumsverket. Me er i gang med å oppgradera dei omnane som blei mellombels utkobla i A-hallen til det same moderne nivået som ble gjort i B-hallen før oppstarten i 2020, og som har vist svært gode resultat, kommenterer fabrikksjefen.

På investeringssida er det også bestemt å bruka 35 millionar kroner på eit lasersystem for å merka produkta frå pressboltstøyperia på Sunndal, Husnes og Karmøy.

– Denne moderniseringa gjer at produkta våre blir meir sporbare gjennom verdikjeda, frå støyperiet frem til kunden, noko som er høgt verdsett blant annet av bilprodusentar som jobbar for å redusera karbonfotavtrykket gjennom hele leverandørkjeda, seier Ystgaard vidare

I pressemeldinga understrekar han at disse investeringa viser at Hydro-konsernet trur på framtida for aluminiumsverksemda i Norge.

– Men ei framleis utvikling av verket krev langsiktige, stabile rammevilkår, inkludert føreseielege låge kraftprisar i framtida, sluttar Ystgård.