God respons for Sinnamekker'n
27.september lanserte Ståle Eskeland boka si «Sinnamekker'ns bilalbum. Bilar med sjel». Så langt har responsen vore veldig bra.
Publisert
Tysdag var Eskeland på forfattarbesøk på Kvinnherad bibliotek for å snakka om boka og fortelja historier.
– Det var veldig gøy å vera på Husnes. Eg veit ikkje kor mange som var der, men det var fleire enn eg hadde forventa, fortel Eskeland på telefon til Grenda onsdag føremiddag.
Annonse
Barnebibliotekar og nestleiar ved biblioteket Cecilie Elisabeth Vestbøstad kan fortelja at det var om lag 30 frammøtte til arrangementet.
– Vi har sett at det har vore rundt 30 på fleire arrangement dei siste vekene. Tysdag kjøpte nesten alle boka og fekk den signert, fortel ho.
Eskeland sjølv fortel at han har selt ein del bøker når han har hatt stand sjølv, som i går på biblioteket. I tillegg har fleire bokhandlarar tatt inn eit godt tal bøker.
– Responsen har vore veldig bra så langt, som er veldig kjekt. Det er jo mange som er interesserte i bil rundt om, så boka traff visst greit, seier forfattaren.
Annonse
I Bergens Tidende 1.oktober gir Jan Nyberg boka seks hjarter - «Eskelands slentrande og ujålete stil, krydra med frodige miljøskildringar frå norsk bygdeliv, gjer den til ei lita perle i bokhausten», skriv han.
– Det var veldig kjekt og heilt uventa. Absolutt eit positivt innslag i kvardagen, seier Eskeland om den fulle potten i BT.
Som kjend er Eskeland ein bilentusiast, og har ifølge boka hatt nærare 500 bilar. Heime på garden har han fleire gonger arrangert «Rust på Ranchen», der folk kjem frå fjern og nær med bilen sin for å vera med.
– Eg hadde ein oppvekst der far min var veldig interessert og eigde fleire bilar, bussar og lastebilar. Det førte til at det var ein del ungdomar på Ritellet og eg fekk vera med dei å skru og køyra bil. Det var nok slik interessa starta, seier Eskeland.
«Den aller første bilen Ståle Eskeland eigde, var ein Volvo Amazon 1963-modell, ein bil med terningar i alle vindauge, skogar av wunderbaum og sota ruter. Unge Eskeland mekka på den gamle doningen og køyrde fram og tilbake på bygdevegane. Eskeland presenterer vitale mål og fysiske detaljar, men minst like viktig er historiene om motorstopp og kollisjonar, kjøp og sal, langturar på smale vegar og reparasjonane som aldri tok slutt. Bli med inn i ei verd med skaisete og dinglande terningar, skambod og pruting, rust og eksos», heiter det i bokomtalen på Samlaget sine sider.
