God framgang på idrettshall-tomta

Hordaland Entreprenør AS er kome godt i gang med tomtearbeidet til Kvinnherad Arena på Husnes.

 

Det har skjedd store ting både på sjølve tomta til Kvinnherad Arena og på den komande tilkomstvegen til idrettshallen.

– Hordaland Entreprenør AS jobbar på og har god framgang, seier prosjektingeniør Kaia Olsen Tjoflåt i Kvinnherad kommune.

Då Grenda snakka med Tjoflåt i mai, skulle den nye tilkomstvegen frå Opsangervegen til idrettshallen og grunnarbeidet på sjølve tomta stå klar 1. oktober. Men av uføresette grunnar er sluttdatoen flytta til midten av november.

– Vi ligg vel éin månad bak den opphavelege framdriftsplanen. Vi støtte på ein del meir steinmassar enn det som var prosjektert, noko som betyr at ein i staden for 1. oktober no reknar med å vera ferdig med vegarbeid og opparbeiding av tomt 15. november, seier Kaia.

 

Tildela kontrakt

Kontrakten med bygginga av idrettshallen, som er kostnadsrekna til 143,2 millionar kroner, planlegg kommunen å tildela før jul.

– Vi reknar med å tildela kontrakten i løpet av desember, så skal vi då til med detaljprosjektering og slikt. Nøyaktig kva tid det blir oppstart på byggjeplass, veit vi ikkje heilt sikkert, seier Tjoflåt.

Også i Rosendal vert det jobba med oppgraderingar av idrettsfasilitetar. Rundt Rosendal Stadion har det kome asfalt, og ein er så og seia klar til å leggja fast dekke.

– Det danske firmaet som skal leggja dekket kjem hit i august. Dei jobbar på eit anna anlegg ein annan stad no om dagen, og kjem direkte hit etterpå, seier ho.