God finalekøyring av Pit’n Bros

Det var tre løp som venta i avslutningshelga, der Pit’n-brørne bytte broderleg på å gjera det best.

I Time Attack-løpet vart det ein 6. plass til Ronny, medan Kjetil enda på 8. plass. I det niande løpet vart det ein 7. plass på Kjetil og ein 8. plass til Ronny. I det siste løpet enda Ronny på 6. plass og Kjetil på 7.

Samanlagtresultata frå sesongens løp skal no bli kontrollerte før dei blir offentleggjort, men Teigen-brørne har allereie fått sjå lista der det kjem fram korleis årets sesong faktisk gjekk.

– Det ser ut til at det vart ein samanlagt 6. plass på meg og ein 8. på bror min. Det har vore 37 bilar med i den serien, så amatørar som oss får sei oss nøgd med det, seier Ronny i telefon på aller siste etappe av heimvegen.

Personleg rekord

I løpet av sesongen låg Ronny ei stund an til ein samanlagt 4. plass, men under finalehelga var det kampen om 6. plassen som var innan rekkevidde.

– Det var ein hard kamp om 6. plassen, så at eg klarte det er eigentleg bra. I tillegg køyrte eg inn til personleg rekord på banen, med to sekund raskare enn sist. Det høyrest kanskje ikkje så mykje ut, men det er tunge sekund, forklarar han.

Ser fram mot neste sesong

Sjølv om sjølve premieutdelinga står att, var dette den siste løpshelga for 2022. Brørne i Pit’n har likevel planane klare for neste år.

– Me har som mål å køyra full sesong då òg, men det er mykje som kan skje, så me får sjå korleis det blir, seier Ronny.

Til neste år er dessutan son hans Mathias 14 år. Han er med det gamal nok til å delta i formel basic-klassa og har planar om å bli med i Racing NM. 2023 vil dermed bli prega av ein del reising på løp med ungdommen òg, og både logistikk og økonomi må på plass for at dei skal nå over alt dei ynskjer.

– Me hadde ikkje fått det til utan sponsorane og samarbeidspartnarane våre, så dei må ha ein stor takk, sluttar Ronny.