Glitrande jubileumskonsert

Strupebandet inviterte torsdag til sin første av tre jubileumskonsertar denne helga. Ein etterlengta konsert sett opp for å feira 40 år som kor, og som vart møtt med stormande jubel frå publikum.

I fjor haust skulle Strupebandet markera sin 40 årsdag med jubileumskonsert, men som følgje av koronapandemien vart denne utsett. Men til stor glede for både strupene og folket, kunne endeleg konserten gjennomførast. Det var tilsynelatande ein kjærkomme festkveld, der stemninga var både rørande og flott frå første stund.

Som Grenda skreiv i fjor haust, er Strupebandet eit blandakor som starta opp hausten 1980. Koret har vore aktivt utan avbrot i desse 40 åra som har gått, og har ikkje berre vore ein svært viktig samlingsstad for musikk- og songinteresserte, men også for folket. År etter år har dei servert minneverdige konsertar, og jubileumskonserten vart ingen unntak.

My! My! Time Flies

Konferansier Bente Sjo sørgja for både latter og tårer då ho leia publikum gjennom repertoaret med ein miks av fakta, og morosame historier knytt til strupebandet si levetid.

– Dette er ein festdag. Endeleg kan Strupebandet feira 40 år som kor, og nokre av strupene her ikveld har vore med heilt frå byrjinga av. Me gir difor Øyvind Særsten, Elisabeth Viken, Arne Hauge, Gunhild Nodland og Bjørg Brækhus ein ekstra applaus, innleia Sjo og held fram:

– Det kjem stadig nye medlemmar i koret, både frå Halsnøy og frå Fastlandet. Dette kan nok skuldast at dei har det så kjekt saman, og me veit at når me har det kjekt, ja då fyke tida. Kva er vell då meir naturleg enn å kalle jubileumskonserten for My! My! Time Flies, smilte konferansieren.

Frøydis Sjo og koret imponerte med opningssongen «Holding out for a hero», etterfølgt av eit forrykande konfettishow. Dette sette verkeleg standeren for kvelden.

Emosjonelt augneblikk

Gjennom førti år har koret sunge seg gjennom eit breitt repertoar saman med ti ulike dirigentar. Det er desse mangfaldige åra som vart spegla denne kvelden. I nesten halvannan time serverte koret fartsfylte songar på rekkje og rad, men også inderlege og meir nedtona satsar. Her kan songen «The Ground» av Ola Gjeilo trekkast fram. Koret dedikerte nemleg denne songen til kulturprisvinnaren Lars Magne Sjo, som har vore ein aktiv deltakar i Strupebandet i 40 år. Dette var både eit emosjonelt og fint augneblikk.

Gjennom programmet stod det fleire solistar i front og leverte flotte prestasjonar. Mellom anna song Rosalin Eide «Andante Andante», etterfølgt av Kristin Isdal med songen «Think of me». Rørande og flott vart det då Dorthea Benjaminsjon og Silje D. Eide dansa til songen «Endgame» med Gjermund Fredheim på gitar og Audun Tvedten på saksofon.

Jubileumskonserten vart avslutta med songen «Dont stop me now» av Freddy Mercury i Queen, og fine ord frå konferansier Bente Sjo:

– Denne songen er ein herleg oppfordring til å ikkje gi dykk med det som er gøy her i livet. Om det er å strikka, mala, teikna eller å gå tur. Kjenn på kva som gjere deg glad, så fortsett du med det!