Gladmelding til småbarnsforeldre

Regjeringa har sett ned prisen frå 3000,- til 2000,- kroner i størstedelen av landet. I distriktskommunar som Kvinnherad er prisen redusert ytterlegare til 1500,- kroner per barnehageplass. Søskenmoderasjon gjer at eit yngre søsken vil få plassen til 980,- kroner, og eit eventuelt tredje søsken vil få gratis barnehageplass.

Stortingsrepresentant Per Martin Sandtrøen frå Sp skriv i eit lesarbrev: «Dette tiltaket gjer det meir attraktivt for barnefamiliar å busetja seg i distrikta, og det gir betre råd til barnefamiliar som allereie bur i distrikta».

Ingen dum tanke

Under budsjettforhandlingane i desember 2023 føreslo Kvinnherad Ap at kommunen bidreg med endå ein hundrelapp per barnehageplass. Alle parti vart med på dette forslaget, og det vart samrøystes vedteke. Då blir prisen 1400,- kroner for ein barnehageplass.

– Det kan vera greitt å nemna at eventuelle matkostnader vil koma på toppen av denne prisen, det er litt ulikt for kvar barnehage, påpeikar varaordførar Thea Vaage.

Vaage meiner at Ap vart latterleggjort ved førre valkamp då dei føreslo gratis barnehage i Kvinnherad.

– Men no ser ein at dette ikkje er ein så dum tanke likevel. Me vil jo at folk skal få ungar her i kommunen, og dette vil vera ein stor reduksjon i utgiftene for barnefamiliar, kommenterer ho.