Gjorde Vestlandets største kokainbeslag på Husnes

Tolletaten skriv i ei pressemelding at aksjonen på Husnes natt til førre torsdag resulterte i det største kokainbeslaget på Vestlandet nokon gong, i overkant av 100 kilo.

– Undersøkingar ved hjelp av Tolletatens ROV (fjernstyrt undervassrobot) og dykkarmannskap frå Kystvakta stadfestar at stoffet hadde vore festa under vasslinja på eit lastefartøy frå Sør-Amerika. Beslaget stadfestar eit kjent modus som Tolletaten har vore spesielt merksame på, skriv Tolletaten.

– Her ser me korleis store fartøy blir nytta til å frakta narkotika under vasslinja, ofte utan at mannskapet er kjent med dette, seier områdeleiar i Tolletaten Bård Ynnesdal i pressemeldinga.

«Nordloire»

Skipet det er snakk om er «Nordloire», som gjekk frå Hydro sitt anlegg i Vila do Conde nord i Brasil den 28. mars, og som la til kai ved anlegget til Hydro Husnes onsdag kveld.

– Under ein ordinær tollkontroll avdekka årvakne kontrollmannskap kjente modus og indikasjonar på nær føreståande smuglaraktivitet. Mistanken blei rapportert vidare til sentrale og lokale tollmynde for vidare oppfølging. Nærare undersøkingar identifiserte lokasjonar og objekt av høg interesse i Vestland fylkeskommune. På bakgrunn av dette blei etter kvart Politiet og Kystvakta kopla på for bistand. Det blei bekrefta at objektet kunne vera eit fartøy på veg til Husnes i Kvinnherad kommune, går det fram av pressemeldinga frå Tolletaten.

– I eit tett og godt samarbeid med Politiet og Kystvakta blei det aksjonert mot eit køyretøy i tilknyting til eit fartøy ved hamna på Husnes. Her ble det gjort funn av i overkant av 100 kilo kokain i bagasjerommet på køyretøyet, seier områdeleiar Bård Ynnesdal.

Beslaget er det største kokainbeslaget gjort på Vestlandet, og blant dei største kokainbeslaga nasjonalt.