Gjorde ein kjempeinnsats for miljøet
Gjennom store delar av mars månad deltok mange av fjerdeklassingane kringom landet i ein konkurranse kalla Batterijakta. Det gjorde også fleire skular her i kommunen, deriblant Undarheim skule.
Fjerdeklassingane ved Undarheim skule klarte å samla inn heile 135 kg batteri, i tillegg har dei fått inn mykje i etterkant også, som dessverre ikkje vart rekna med i totalen.
– Dei spurte foreldre, naboar og dei gjekk rundt i bygda og banka på dører for å samla inn meir. Dette gjorde dei heilt på eige initiativ, fortel kontaktlærar Nikolai Fjellandsbø.
Annonse
Ivrige
– Det var også mange av foreldra som tok initiativ til å samla inn ein del, då gjerne gjennom jobben der nokre hadde god tilgang til brukte batteri, fortset han.
Elevane er ivrige når dei fortel om korleis dei samla inn alt saman.
– Eg lånte sykkelkorga til broren min for å sykla rundt i nabolaget og samla inn batteri. Eg samla inn nesten 10 kg, men så gløymde eg å ta det med på skulen, fortel fjerdeklassingen Leonard Hortmann engasjert.
Annonse
Han var heller ikkje åleina om å vera litt gløymsk. Då Maria Viken Straumsøy var i Herøysund ein dag, bestemte ho seg for å prøva å samla inn litt batteri der også. Noko ho klarte, men dessverre gjekk også desse batteria i gløymeboka.
I tida då konkurransen varte fekk dei også ulike vekesoppdrag, og for kvart vekesoppdrag kunne dei samla inn ekstrapoeng. Blant anna fekk dei i oppdrag å laga kunstverk av batteria og informative plakatar, noko som såg ut til å ha sett i gong fantasien hjå mange.
Tilspissa
Men sjølv om dei hadde det artig med vekesoppdraga som kunne gje dei fleire poeng, så valde heller fjerdeklassingane å fokusera på å samla inn mest mogeleg batteri.
– Etter kvart blei elevane så gira at det utvikla seg til å bli ein ganske tilspissa intern konkurranse om kven som klarte å samla inn mest, fortel ein smilande Fjellandsbø.
Ikkje berre har dei hatt det kjekt medan konkurransen føregjekk, men i fylgje både elevar og lærarar så har dei har også lært ein heil del.
Annonse
– Det er viktig å ikkje kasta batteri i bosset, men heller resirkulera dei. Eg er også litt overraska over kor mykje batteri som samlar seg opp heime, seier fjerdeklassingen Lykke Ekeland Lillesand.
Kontaktlærar Fjellandsbø bekreftar at det er fleire som har hatt same opplevinga som Lykke.
– Det er mange som har fått seg ei aha-oppleving, og når ein heile fjerdeklasse får det så er ein slik konkurranse verdt det i seg sjølv, uavhengig av ekstrapoeng og premiar. Dei er blitt mykje meir bevisste på kva som skal kor, no spør dei gjerne kor dei ulike tinga skal kastast, fortel han engasjert.
– No er det ikkje berre mat, papir og restavfall lenger. No veit dei at det er fleire kategoriar, og at noko er spesialavfall. Og det er kjempebra! avsluttar han.
