Gjøa opnar att

Resy Aak Toresen og mannen Dag Rune Toresen tek over drifta av restauranten, i godt samarbeid med eigar Åge Sørensen.

-Utan hans ekspertise på laget ville vi kanskje ikkje takka ja til dette, seier Resy, og legg til;

– Vi kjem til å fortsetja med å få fisk og råvarer gjennom Åge. Han er full i kunnskap og det vil vi nytta oss av.

Resy og Dag Rune har i fleire år budd på Husnes, og mellom anna drevet parfymeri og Dr. Munk i si tid. Resy har jobba som hotellsjef på hotellet på Husnes, men også jobba på fjordhotellet og med politikk. For elleve år sidan flytta dei til Senja, der dei har mellom anna jobba på Hamn i Senja, eit ferie- og konferansesenter og drevet ein pub på ein stad med 300 menneskjer. Resy har i tillegg jobba som lærar og Dag Rune har jobba i spesialgrossisten «Godt Lokalt».

Lei av 9 månader med vinter

Dei to har alltid hatt planar om å flytta heim, men det er heilt tilfeldig at det skjer no.

– Vi har nokre venner som har sagt «skal dykk ikkje flytta heim og driva Gjøa», og vi tenkte vel eigentleg at det ikkje passar heilt med tanke på barna våre og diverse, men så snakka vi med svigerson til Åge, og han tok kontakt med Åge som igjen ringte oss, fortel Resy.

Åge ringte til paret ein dag i mai. Ute snødde det, og å driva restaurant i Rosendal var meir enn freistande når ein såg ut. Åge på side hadde fått eit tilbod av Milano pizza og kebab som han helst ikkje ville takka ja til. Så når Resy og Dag Rune sa ja til å driva Gjøa kunne han smila nøgd.

– Dei har same filosofi som meg, men dei har også tida til å driva staden, fortel han.

23. juni opnar dei altså dørene att, og det vart rekefest med dei største rekene, lovar Åge.

Ikkje berre sjømat

Det er eit kjent fenomen at det kan vera lite folk i Kvinnherad om vinteren, men paret har mange planar om ting som kan trekka folk ut av vinterhia sine.

– Vi har lyst til å arrangere intimkonsertar, quiz, whisky- øl- eller vinsmaking, og vi kjem til å kunna arrangera alle typar feiringar i tillegg til å tilby catering, fortel Resy og Dag Rune.

– Aktivitet skapar aktivitet, så det kan ikkje bli for mykje, legg Dag Rune til.

– Det er mykje kultur her i Rosendal, og målet er at vi kan vera med å heva matkulturen, seier Åge.

Det er ikkje enkelt å få fatt i arbeidskraft for tida, men heldigvis er nokre av dei som har jobba på Gjøa tidlegare med vidare. Dag Rune og Resy kjem til å trå til der det trengs, både på kjøken og på golvet, men elles treng dei fleire servitørar.

Menyen kjem til å bestå mest av sjømat, sjølvsagt med alternativ for dei som ikkje et det. Dag Runeog Resy tek med seg lokale fiskerettar frå Senja, til dømes grilla tørrfisk, torsketunge og boknafisk.Dei vil ha ope til lunsj og ha enkle retter som ein kan ta med seg ut døra.

Og ja, det vil vera sushi. Foreløpig har dei ikkje ein sushikokk, men Åge har fått til eit samarbeid med

Sabi Sushi i Bergen som vil levera sushi eit par dagar i veka.

– Det vil bli ein enkel sushimeny med fokus på kvalitet, lovar Åge.