Gjev ut bok med historier om menneske og relasjonar

Boka er ei novellesamling med korte historier som Marina har samla opp over 15 år.

– Eg byrja å skrive utan tanke om å gje ut bok. Eg har skrive og skrive, og så var det nok til ei bok og då tenkte eg at eg kunne gje ut.

– Det er berre ein barndomsdraum som kom ut i verda i april i år. Boka lever sitt eige liv no, seier ein relativt audmjuk forfattar over telefon til Grenda.

Ho skriv framleis, men har per dags dato ingen planar om å gje ut ein bok nummer to.

Filosofi, relasjonar og skjebne

Etter 10 år som overlege på Valen sjukehus, flytta ho til austlandet for å få nye opplevingar og utfordringar. Eit nytt perspektiv. Sjølv om ho har jobba lenge innan psykiatrien, er det lite av det å finna i boka hennar.

– Boka handlar om menneske og relasjonar. Det vanlege livet har inspirert meg heile mitt liv. Skjebne og haldningar og djupe samtalar, fortel Ivanina og legg til;

– Det er også filosofiske spørsmål, men ikkje dei tunge. Eg trur at alle kan forstå og kjenna seg igjen i historiene. Eg trur dei er lette å lesa.

God hjelp av vener

Marina budde på Valen då ho arbeidde på sjukehuset, og har framleis huset sitt der. Ho er innom Kvinnherad fleire gonger i året.

Det har teke tid å laga til boka, då Marina har skrive på andre språk og så omsett til norsk. Ho har fått god hjelp av vennene sine Gerd og Arild Lilleeng på Valen.

– Eg er veldig takksam for hjelpa deira. Dei har hjelpt meg mykje med språket, men også illustrasjonane, dei har Gerd laga. Det har på ein måte vore vårt prosjekt saman, fortel Marina.

I den første utgåva av boka har ikkje forlaget skrive at Gerd har teke bileta. Dette tykkjer Marina er trist. Ho har fått lovnad frå forlaget Calidris om at i neste utgåve skal dei retta opp i dette.