Gjev tilskot til eldrefest: – Dei gjer ein kjempegod jobb

Kvart år sidan 2016 har Pensjonistforbundet HVØ feira Den internasjonale eldredagen med fest for pensjonistane i Ølve, Hatlestrand og Varaldsøy. Dei har servert smørbrød frå Engevik Gard og heimelaga kaker, medan Kvam trekkspelklubb har spelt opp til dans. I tillegg har det vore ein ny festtalar kvart år.

«Interessa for Eldrefesten har kvart år vore overveldande, og vi tar imot både medlemmer og ikkje-medlemmer. Dei siste åra har vi tatt 200 kroner i inngangspengar, men ettersom alt er blitt dyrare, har underskotet for festane auka år for år», skreiv leiar Rita Martens Meyer i ei brev til eldrerådet i kommunen.

Underskot

Rekneskapen frå eldrefesten i oktober 2023, viser inntekter på 12.500 kroner, men utgiftene var på 28.000. Altså eit underskot på 15.500 kroner. Dette har Pensjonistforbundet HVØ dekka sjølv.

«Vi vil gjerne invitera til Eldrefest i år også, utan å måtta auka inngangsprisen alt for mykje», skreiv Meyer, og søkte om 10.000 kroner til årets fest.

Søknaden var eigentleg stila til Eldrerådet, som har ein eigen pengepott, men vart i staden lagt fram for formannskapet.

– Eldrerådet har ein pott, men eg synest formannskapet skal ta kostnaden denne gongen, sa ordførar Vegard Bjørnevik (H). Han føreslo å løyva 10.000 kroner, noko som vart samrøystes bestemt.

Støtta dei igjen

Rundt bordet vart det sagt mykje fint om arbeidet til eldsjelene på Hatlestrand, Varaldsøy og Ølve.

– Veldig kjekt at ein får til slike eldrefestar rundt omkring, men synd det ikkje går rundt, kommenterte varaordførar Thea Vaage (Ap).

– Kjempepositivt at dei har eigen fest. Det er veldig bra at lag og organisasjonar tek dette sjølve, og vi kan gjerne oppmoda fleire om å gjera noko liknande, sa Veronica Thorkildsen Thorsen (Sp).

– Føremålet er veldig flott. Vi veit det er mange eldre som lever i utanforskap. Vi veit òg at det er blant eldre det er høgast sjølvmordsrisiko, opplyste Silje Nordtveit Olsen (SV).

– Pensjonistforbundet HVØ gjer ein kjempegod jobb. Kjem dei med fleire søknader, så skal vi støtta dei igjen, slo Jostein Rødland (INP) fast.