Gjæv pris til Brit Landa sin nye film
Halsnøybuen Brit Johanne Eide Landa mottok måndag kveld sin første pris for den nye kortfilmen hennar, «800 001».
Publisert
Sist oppdatert
Det var under Oniros Film Awards i New York at filmen henta inn pris i kategorien «Beste eksperimentale film». Dei andre filmane som var nominert i denne klassen var «A Thunderbolt for Michelle» av Knútur Haukstein Ólafsson, og «Hibernation Dream Submitter» av Zara Sands. Men av desse tre var det altså filmen til Brit Johanne vart vurdert som sterkast. Sigeren deler ho med resten av teamet, som den dyktige filmskaparen omtalar som fantastisk.
«800 001» har undertittelen «Merkar du at eg er borte», og er ein kortfilm som handlar om psykisk helse. Dette er ein tematikk Brit Johanne brenn for.
Annonse
– Det er utruleg kjekt at filmen har blitt verdsett, og at nokon ser verdien i det me har laga. Det ligg jo mykje hardt arbeid bak, og det er veldig stas å bli sett og høyrt. Men det viktigaste for meg er likevel historia, og at tematikken som filmen fortel om kjem ut, fortel den takksame regissøren over telefon.
Etterdønningar av isolasjon
Ho byrja å skrive manuset til filmen då Oslo stengte ned for andre gong under pandemien. Landa budde då i hovudstaden og kjende behov for å nytte filmen til å utforske kva isolasjon har å sei for dei mest sårbare, for born og for dei som var einsame frå før.
Store delar av filmen er laga på Halsnøy kloster, ein stad som baud på høvelege rom for tematikken.
Annonse
– Om ein bur i store hus kan ein kjenne seg einsame og fortapte. Etter covid er det fleire som har slitt med sosial angst, og eg er interessert i å undersøke kva etterdønningane av nedstenginga har ført med seg, fortel ho vidare.
Dette er ikkje første gong Brit Landa blir heidra for filmane sine, kor ho har gjort seg merka både framføre og bak kameraet. Som regissør debuterte ho med filmen «Sjelsstyrke» i 2017, ein film som hausta denne fleire – heile 17 – høgthengande prisar i den internasjonale filmverda. Filmskaparen drog mellom anna heim tittelen som Beste kvinnelege regissør frå London Independent Film Awards. «Sjelsstyrke» tok også opp tematikken med psykisk helse, og også i denne vart Halsnøy kloster nytta i innspelinga.
Lokal premiere på Halsnøy kloster
Kortfilmen «800 001» er no sendt inn til ei rekkje festivalar i år og til neste år, og allereie 20. september kan den bli premiert igjen. Dette bidreg utvilsamt til at det rår store forventningar til den komande premieren av filmen her i Kvinnherad, som vil haldast på Halsnøy kloster 25. september.
– Eg håpar det blir like fint som sist gong, men det vil bli eit annleis arrangement denne gongen, fortel regissøren, som lovar monologar og performance under hendinga.
Dette vil mellom anna skje i samarbeid med elevar frå folkehøgskulen. Landa gler seg til å visa filmen, og set dessutan stor pris på samarbeidet med og støtta frå Helen Petersen og Halsnøy kloster.
