Gjev ein skuledag for Guatemala

Leah Mo og Emilie Vimme Olsen er i gang med å arrangera Operasjon Dagsverk for medelevane sine. 31. oktober håpar dei å kunna senda mange dagsløner til Guatemala, og prosjektet «Ein bit av gongen».

– Guatemala er spesielt råka av klimaendringane, både med tørke og ekstremvêr. Unge bønder er hardt ramma av dette, og det er vanskeleg for dei å få dyrka nok mat, fortel Emilie Vimme Oslen.

Saman med Leah Mo er ho klar for årets Operasjon Dagsverk, der pengane skal gå til Guatemala. Det nærmar seg kick-off, der dei skal ut i alle klassar og informera om OD, og forsøka å få med seg så mange medelevar som råd på prosjektet.

– Så skal me laga til ein internasjonal dag i kantina. Då blir det ein kahoot-quiz om temaet for årets innsamling, og så serverer me mat frå Guatemala, fortel Leah Mo.

Oppfordrar til å bli arbeidsgjevar

Elevane skal skaffa seg ein dags arbeid, anten frå private som treng hjelp til noko, eller frå bedrifter eller butikkar som vil bidra. Arbeidet som vert gjort skal lønast med 450,- kr som går rett til OD-prosjektet.

– Me vil oppfordra folk som har arbeidsoppgåver dei vil ha gjort, om å ta kontakt, seier Leah.

Ein kan registrera seg som arbeidsgjevar på nettsida til OD, eller ta kontakt med skulen. Betalinga skjer ikkje via elevane, men blir betalt rett til OD. Jentene påpeikar at opplegget kan vera fleksibelt.

– Det må ikkje nødvendigvis vera 31. oktober, elevane kan jobba ettermiddag eller kveld andre dagar óg, om det passar betre for den som treng hjelp til noko, forklarar Leah.

Vaska bilen til pappa

Emilie og Leah går i tredje klasse, og har vore aktive med OD-arrangering alle tre åra dei har vore på KVV. Dei ser fram til årets aksjon.

– I fjor fekk me inn 94 000 kroner. Det var meir enn året før. Me håpar jo sjølvsagt på rekord i år, seier Emilie.

Ho ser for seg at Husnestunet vil bli hennar arbeidsgjevar under OD, sidan ho jobbar der fast til vanleg. Det gjer ho ingenting å jobba gratis ein dag for ei god sak. Leah veit ikkje heilt kva jobben hennar blir i år.

– I fjor vaska eg bilen til pappa, i år er eg ikkje heilt sikker, men eg skal iallfall finna noko eg kan bidra med i år óg, smiler ho.

Ikkje heilt rettferdig

Emilie og Leah påpeikar at venskapsbyen til Kvinnherad er i Guatemala, og at det kan vera ein motivasjon for å bry seg ekstra akkurat i år. Operasjon Dagsverk skal mellom anna bidra med pengar inn i prosjekt som skal driva med opplæring i klimatilpassa jordbruk for unge bønder i landet, og få auka matproduksjonen og inntektene.

– Det er jo ikkje heilt rettferdig når ein tenker på at det er oss i dei rike landa som slepp ut mest CO2, men det er land som Guatemala, med låge utslepp, som blir mest råka av klimaendringane, påpeikar Emilie.

– Dette handlar om at me som har det nokså godt her i Noreg kan gje eit dags arbeid til nokon som ikkje har det like trygt som oss, seier Leah Mo.