Gjesta Eides Språksjov: – Ei oppleving for livet

Tysdag i førre veke tok Arne Torget med seg familien sin og reiste til Bergen for å snakka både om og på rim i lag med vossatrioen i Eides språksjov.

– Det var veldig kjekt, og overraskande overveldande å plutseleg vera der. Eg var i svært liten grad førebudd, for heile meininga var at det skulle vera spontant. Eg fekk nokre oppgåver, og dei snakka litt om korleis eg skreiv. I tillegg så måtte eg svara på rim, og eg vart også utfordra til ein rimstafett med Linda, Gunnstein og Sjur, fortalde Torget nokre dagar etterpå.

Finter og stas

Torget var klar på at det var ei stor æra å få vera med, trass i at han ikkje hugsar alt som vart snakka om.

– Det gjekk så fort, og plutseleg var det over. Opptaket vart gjort med publikum i salen, og eg forsvann litt inn i ei boble då eg sat der oppe, men dei ville ikkje ha noko opptak nummer to, så det må jo vera positivt, poengterte han.

I salen sat også familien til Torget som var med som både støtte og heiagjeng, og Torget er ikkje i tvil om at det var ei stor oppleving.

– Det var veldig stas å få møta professoren, og det var enormt spanande å måtta ta det heilt på direkten. På slutten måtte eg oppsummera alt saman på rim, med tonefølge av Sjur. Det var ei oppleving for livet, understreka han.

Vossatrioen i studio prøvde også å lura poeten frå Kvinnherad ut i nokre rimefeller, men det skulle syna seg å vera lettare sagt enn gjort.

– Dei prøvde å finta meg ut med nokre ord som er nærmast umogelege å rima på, men der trefte dei feil mann for det var lett, fortalde Torget leande.

– Kva ord var det då?

– Eit av dei var ordet «sfinks», svara Torget.

– Og kva rimar på «sfinks»?

– Nei, det må du sjå på programmet for å finna ut, svara han med ein rungande og hjarteleg latter.

Fleire bøker

I fylgje poeten sjølv har han byrja å få litt meir fotfeste rundt omkring gjennom ulike oppdrag, noko som absolutt har gjort noko med han.

– Det er kjekt at det var ein nynorskmann som fekk vera med, eg brenn veldig for både nynorsk og målsaka. I tillegg var det stas å få litt anerkjenning av min måte å skriva på og som poet. Eg har jo skrive veldig mykje, men eg har gjeve ut svært få bøker, sa Torget.

Det blir det derimot ei endring på no. Etter å ha vore gjest på Språksjovet, i tillegg til at han i år for fjerde gong var med på litteraturfestivalen i Skudeneshamn som huspoet og referent, samt at han også er fast konferansier på litteraturfestivalen Blest i Tysvær, så har Kvinnherad sin store poet turt å ta steget endå meir ut.

– Det kjem fleire bøker i åra framover. Neste blir ein roman som eg held på med. Det starta som ei novelle eg skreiv for 25 år sidan, men det er fyrst no eg har turt å hiva meg ut i det. Kor lang tid det tek å få ho ferdig veit eg ikkje, men no er i alle fall historia klar i hovudet mitt, erkjente Torget.

– Tittelen kom til meg for 25 år sidan; Tretten sekund. Eg vil ikkje røpa så mykje meir enn det, men eg tykkjer historia er god. Så det blir det neste, avslutta han.