Gjennomførte storøving i Fjellhaugen

– Dagen starta med det me kallar for ringløype der mannskapet øver på ulike øvingar, blant anna hurtigsøk, funn av personar i skred og skredsøk ved hjelp av sendar/mottakar, fortel øvingsansvarleg Sondre Solheim.

Treng fleire

Så blir klokka tolv, og mannskapa frå dei ulike etatane og avdelingane gjer seg klare til den store øvinga. Praten går lett og ledig medan dei ventar på meldinga som skal koma, enkelte nyttar høvet til å kasta ball med Border Collien Zita som gladeleg hentar den gule ballen til alle som vil kasta. Fram til meldinga kjem er det ingen som veit nøyaktig kva dei skal øva på.

Ein av dei friviljuge ved Fjellhaugen skisenter Per Korsvold er klar på at ein aldri kan trena nok på slike ting.

– Me øver på å bli betre på bistand ved skredulukker. Det går jo ofte skred i fjellet, og dette er i aukande grad blitt ein utfartsplass i all slags ver og vind. Det er viktig at lokale krefter som er med har den rette kunnskapen, seier Korsvold.

Kring beina på oss kjem det stadig fleire firbeinte til. I tillegg til Zita er også Chesapeake Bay Retrieveren Benny og Golden Retriveren Caro med på dagens øving. Av dei tre er det berre Zita og Caro som er godkjende redningshundar, medan Benny førebels må skilta seg som elev.

I fylgje hundane sine eigarar, som alle kjem langvegs frå for å delta, er det nok å halda fingrane i når ein har som hobby å vera godkjend ettersøksekvipasje.

– Det varierer kor mange øvingar me har, den neste månaden skal me til dømes ha fem. Me trenar sjølvsagt også ein del utanom, gjerne kvar helg. Det blir fort ein livsstil meir enn ein hobby, innrømmer ein av førarane Tor Monsen som har teke turen frå Askøy for å bli med på øvinga.

Det må også dei to hine førarane seia seg einige i, samtidig etterlyser dei fleire hundar i Kvinnherad.

– Her i Kvinnherad finst det jo mykje fjell, og trass i at det finst ein gjeng i Odda-området som er veldig gode å ha, så treng de absolutt fleire hundar her. Eg trur kanskje det finst éin godkjend hund på Utåker, men elles er det ingen, legg han til.

Ser forbetringar

Så kjem meldinga. «Det har gått snøsskred oppom Røde Kors-hytta ved Fjellhaugen skisenter. Fire personar er tekne av skredet» kan ein høyra sprakande gjennom radioen. Naudetatane rykkjer ut, og ambulanse og brannvesen er dei fyrste på staden. For å gjera øvinga så realistisk som mogeleg må Røde Kors og hundeekvipasjane venta litt til før dei får setja i gang.

– I og med at Røde Kors bruker litt lenger tid på mobilisera, så må me venta i ti minutt, forklarer ein frå Røde Kors.

Innan Røde Kors er på plass har mannskapet frå naudetatane allereie funne to personar, i dette tilfellet to dokker som er spesiallaga til føremålet. Livreddande tiltak vert utført på dei som vert funne, andre søkjer vidare medan hundane og Røde Kors gjer seg klare.

Aktiviteten er høg, alle fokuserer på det dei skal gjera og kommunikasjonen går tilsynelatande kjapt og effektivt. Til slutt er det berre éin person att som ikkje er funnen. Då vert det bestemt at alle skal trekkja seg ut slik at hundane får arbeida i fred og ro. Etter det er det kort prosess før alle fira er funne.

Etter øvinga seier Politistasjonsmester Sigurd Børve seg nøgd med resultatet.

– Me har merka at utfarten vinterstid har endra seg kraftig dei siste åra, så politiet har hatt som plan å vidareutvikla vinterkunnskapane til alle naudetatane her i Kvinnherad. Me byrja i fjor med blant anna eit kurs på Finse, men eg må også skryte av Røde Kors som aktivt har jobba med å auka sin kompetanse, fortel Børve.

– Me har tidlegare støtta oss mykje meir på Hardanger og Ullensvang, men det å bli betre og auka kompetansen vår er berre positivt. Det er kjekt å sjå forbetringa på effektiviteten enn for berre nokre år sidan. Det har gått veldig fint, fortset han.

Ingen «quick fix»

Dei totalt 30 deltakarane samlast like nedom øvingsområdet for ein kjapp gjennomgang på kva som gjekk bra og kva som må øvast meir på. Øvingsleiar Solheim seier seg i all hovudsak nøgd.

– Det har gått veldig bra, mannskapet har vore flinke og effektive, konkluderer Solheim kjapt.

– Men dette er rett nok ingen «quick fix». Det me held på med her i dag er kompetansebygging. Oftast er det brannvesen og ambulanse som kan utgjera ein skilnad, då er det viktig at dei veit kva dei skal gjera. Politiet har meir fokus på sikkerheit. Me må vera sikre på at det er trygt å senda folk inn i skredområdet, og det er det ikkje alltid at det er, understrekar han.

Børve poengterer avslutningsvis at både politi, brannvesen og ambulanse har øvingar året gjennom på ulike typar scenario, men at det dei kvart år i veke seks kjem til å ha ei slik øving som dette.