Gjekk ned ein annan veg enn dei andre

Laurdag kveld kom det melding om at éin person var sakna ved fjellet Juklavasstinden (1.360 meter). Brannvesen og politi rykte difor inn til Myrdalsvatnet i Rosendal.

 

Klokka 19.30 vart to brannbilar og ein politibil observerte på veg inn Melsdalen mot Myrdalsvatnet. Det var snakk om at dei skulle ta båt med påhengsmotor over vatnet. Samstundes var også troppen frå Husnes på veg innover, med ein ATV på lasset.

Operasjonssentralen til Vest politidistrikt opplyste laurdag at det var to personar som var komne bort frå kvarandre ved den bratte Juklavasstinden. Men måndag kan politibetjent Sondre Solheim ved Kvinnherad lensmannskontor fortelja at det var tre personar med på turen.

– Ein av dei valte å gå ein annan veg nedover. Då dei to andre kom fram til teltplassen inst ved Myrdalsvatnet, var han ikkje å sjå, trass i at han burde vore der for fleire timar sidan. Dermed frykta dei at noko hadde skjedd, spesielt med tanke på terrenget han skulle bevega seg i, seier Solheim til Grenda.

 

Ingen dramatikk

Politiet fekk raskt avklart at det stod bra til med tredjemann.

– Vi har no hatt kontakt med den som var sakna. Vedkomande er i god behald, så det er ingen dramatikk, fortalde operasjonssentralen laurdag kveld.

Men grunna dårleg mobilsamband, tok brannmannskapa seg over Myrdalsvatnet for å undersøkja med sjølvsyn.

– Der stod alt bra til, stadfestar Sondre Solheim.

Det kan nemnast at Juklavasstinden ligg like ved Bjørndalstindane, der det var ein redningsoperasjon helga før. Då vart to klatrarar i skårfeste henta med helikopter. Også fredag kveld var det ein redningsaksjon i fjella kring Rosendal. Då vart ein person heist ned med ambulansehelikopter frå ein stad i nærleiken av Bjørndal.