Gir «Trio løftet» til barn og unge

– Det viktigaste er å inkludera barn og ungdom i idretten lengst mogeleg. Som kvalitetsklubb har me eit krav på oss til samfunnsarbeid og verdiarbeid. Det handlar om å sikra inkludering og halda dei unge i idretten lengst mogeleg, sa Kristine Røyrvik, Maria Thorsen Solheim og Kenneth Ingvaldsen då dei presenterte Trio Løftet for pressa.

Økonomi

Trioen utgjer gruppa som har jobba fram løysingar som vonleg hindrar at dårleg råd blir grunnen til at nokon sluttar å spela fotball.

– Me ynskjer å gje dei lyst til å halda fram med idretten, blant anna ved å gjera økonomi til eit underordna problem, seier Kristine Røyrvik om Trio Løftet.

Når Trio snakkar om inkludering, så snakkar dei både om flyktningar, asylsøkjarar og barn og unge frå låginntektsfamiliar.

– Tidlegare statistikk viser ar 10,1 prosent i Kvinnherad høyrer til ein låginntektsfamilie. Eg blir ikkje overraska om dei tala har auka det siste året med tanke på prisstiginga i samfunnet. Blant anna einslege føresette har meldt inn at det kan vera tøft økonomisk i desse tider. For ei fotballgruppe på 450 barn og unge, så må me ta høgde for at dette kan vera aktuelt for fleire enn me kanskje trur, seier Maria Solheim Thorsen.

Det kostar

Gruppa har laga ein oversikt over kva det kostar med ein fotballungdom. Utan cupdeltaking på eksempelvis Norway Cup eller Sør Cup har gruppa summert seg til 4200 kroner i året, som det minste det vil kosta. Med cupdeltaking kjem sluttsummen deira nærmare 7000, alt ettersom kva dugnad som vert lagt ned hjå laget.

Trio har tatt konsekvensen av den erkjenninga, og har utarbeidd utstyrspakkar som ein kan få støtte til å kjøpa.

– Tanken er at ein skal kunna søkja om det ein treng støtte til, utan å måtta leggja ved attestar eller kontoutskrifter. Trenarar og lagleiarar skal også kunna søkja på vegner av barn og ungdommar. Dei ser barna og ungdommane, og veit ofte kven som treng kva, seier Kenneth Ingvaldsen.

Prøveprosjekt

Trioløftet er eit toårig prøveprosjekt, og Trio har fått støtte frå fleire kantar for å gjera samfunns- og verdiarbeidet. Sparebank1 Stiftinga Kvinnherad har gitt 93.000 kroner over to år til integreringsarbeid, for å dela ut ein startpakke for fotballutstyr til born og unge innan segmentet flyktningar og asylsøkjarar, og barn og unge frå låginntektsfamiliar.

Ildsjelfondet til Sparebank Vest har på liknande vis gitt 25.000 kroner til inkluderingsarbeidet, der trioen seier dei ser på ulike tiltak, til dømes aktivitetskveldar og turar. Dei applauder og initiativet i kommunen med å få på plass aktivitetskort eller fritidskort for å sikre inkludering i fritidsaktivitetar.

På sikt ynskjer Trio å inkludera dei andre idrettsgreinene i idrettslaget i Trioløftet.

– Tilsvarande vonar me at andre klubbar og lag kan koma i gang med tilsvarande prosjekt. Me deler gjerne av våre erfaringar om nokon ynskjer draghjelp, sluttar Røyrvik, Thorsen og Ingvaldsen.