Gir seg på Stortinget og i politikken

Hans Inge Myrvold har brukt sommaren til å vurdera eiga framtid, og har landa på at det er slutt på politikken når stortingsperioden er over neste sommar – for denne gong. Avgjerda har modna seg i løpet av dei siste vekene.

Generasjonsskifte utsett

– Eg har tenkt mykje over lang tid på korleis det blir. Sjølv om eg har vore snart tre år på Stortinget, så har det likevel vore på ein slags nåde. I det augeblikket Kjersti Toppe ikkje var minister lenger, ville eg vore ute av Stortinget på timen, forklarer Hans Inge Myrvold.

Senterpartiet starta nominasjonsprosessen til 2025-valet i vår.

– Same dag som spørsmålet kom, svarte eg at eg stiller meg til disposisjon. Eg svarte også at ein bør tenka på eit generasjonsskifte og omstilling i partiet, for Sp har ein god gjeng unge, flinke politikarar som kjem opp i Hordaland. God tilvekst i partiet, og eg meiner det hadde vore strategisk smart å gjera noko, seier Myrvold når Grenda vitjar han heime på Hatlestrand.

På den tida var det kome få signal frå barne- og familieminister Kjersti Toppe og den faste stortingsrepresentanten Nils Bjørke, men dei svarte begge seinare at dei ynskjer ein ny periode.

– Det løyste ut litt tankeverksemd hos meg. Tilbakemeldingane er at ein andreplass kunne vore innan rekkevidde, men eg har tenkt ein del på dette no opp mot der eg sjølv er i livet. Eg har difor landa på at eg kjem til å trekkja meg frå nominasjonen, og at eg ikkje er aktuell som kandidat til valet neste år, legg han til.

Ynskte meir

Motivasjonen var å halda fram på Stortinget, og bidra der.

– Når realiteten blir i beste tilfelle ein varaplass, så kjenner eg at eg vil meir. Då meiner eg er det riktig av meg å tre til sides og trekkja kandidaturet mitt. Eg trur det kan vera positivt for meg å returnera til næringslivet, og eventuelt jobba med politikk på eit seinare tidspunkt. Så det er eit komma, ikkje eit punktum for min del. Her og no kjenner eg at dette blir riktig, seier Myrvold.

Etter alle solemerke blir det éin representant frå Sp etter neste val, etter at partiet har hatt to periodar med god oppslutting og to Hordaland-representantar.

– Eg gir meg i politikken, i denne omgangen. Eg vil ikkje seia at eg gjer det for godt.

– Har du nokon konkrete planar?

– Det er litt for langt fram, men eg har lyst å nytta erfaringane eg har gjort som ordførar og på Stortinget, og gjerne jobba i symbiosen mellom næringsliv og politikk. Så veit eg at det er avgrensa med arbeidsplassar her i distriktet som fell inn i den kategorien. Men det må vera eit mål å få det til, analyserer Myrvold.

Som ei skilsmisse

– Denne tanken var mykje meir skremmande for nokre veker og månader sidan. Det kjennest mest som ei skilsmisse. Eg har vore gjennom det også, så eg veit det. Eg kunne valt ei anna tilnærming, gått for førsteplassen og gått i kampvotering, men eg ville ikkje fått nok støtte. Å utfordra ein sitjande statsråd er ikkje realistisk. Det erkjenner eg, seier han tankefullt.

Myrvold blir 40 år i januar, og meiner sjølv han går ut av dei yngre sine rekker då.

– Eg kjenner på svolten etter å prøva på noko nytt, den har styrka seg i løpet av dei siste to månadane. Det nærmar seg ti år med politikk som altoppslukande livsstil, erkjenner han.

Han har tre år bak seg på Stortinget, og det i ei krevjande tid både økonomisk og geopolitisk.

– Det har vore ein tung periode, med krig og pandemi, men det er også ein periode der me har klart å sikra ein betre kommuneøkonomi, og sikra meir inntekter på naturressursane våre, seier Myrvold nøgd.

Han viser til havbruksfondet, som kjem til å gje rekordutbetaling til Kvinnherad i år, samt utjamning på barnehagebetaling, og aktiv politikk på kutting i ferjeprisar.

– Ein har jobba konsekvent for betre rammevilkår for distrikta. Det er også rom for å seia at ein skulle gjort meir, men i sum er dette gjort innanfor eit handlingsrom. Det blir ein tøff valkamp, men eg håper at veljarane tenkjer seg om eit par gonger, for det er framleis ein del billig retorikk som blir brukt, meiner 39-åringen.