Gir kurs i digital minnebok for dei demente
Onsdag og torsdag inviterer Halsnøytunet og Husnestunet til pårørandekafé. Ønsket er at dei pårørande skal hjelpa til i ei digitalsatsing for dei demente.
Publisert
Målet er at den einskilde demente skal få si eiga digitale minnebok, med filmar og bilete frå deira eige liv.
– Me har slike på kvar einskild brukar no, men me har det berre i papirform no. Når me samlar dette digitalt, så blir det lettare tilgjengeleg for både brukar, tilsette, pårørande og eventuelle frivillige som har kontakt med den demente, forklarer Anne Marit Eikemo Ersland.
Annonse
Pårørandekafé
Onsdag (Halsnøytunet) og torsdag (Husnestunet) blir det pårørandekafé, der det blir høve til å fylla på minneboka til dei demente.
– Det skal vera med elevar frå vidaregåande til å hjelpa dei pårørande med å leggja inn informasjon. Dei pårørande må ha med digitale hjelpemiddel slik at ein kan leggja inn i brukaren, forklarer Eikemo Ersland.
Verktøya dei no tar i bruk er mellom anna MinMemoria, der ein nyttar iPad, og Televindu som nyttar saktefilmar tilrettelagt for dei med demens.
Annonse
– Dette er digitale hjelpemiddel som me gler oss over å kunna ta i bruk. Dette kan vera med på å dempa angst og uro hos den demente, ved å by på kjente ansikt og minne, påpeikar ho.
MinMemoria gjer livshistoria til den einskilde brukaren digitalt tilgjengeleg, og blir eit verktøy kor dei pårørande kan dele bilete, minne og interesser frå deira kjære sine liv. Samtidig vil tilsette og frivillige bli betre kjent med bebuarane, og med det tilpassa omsorga og aktivitetane ut i frå interesser og behov hos den einskilde brukaren.
