Gigantstøtte til lokalt hydrogenselskap: – Som 17. mai og julaftan på same dag

Det er Enova som meldte dette i ei pressemelding tysdag føremiddag. Målet er at satsinga skal vera eit springbrett for bruk av hydrogen i norsk skipsfart, og at hydrogen på sikt skal bli eit meir tilgjengeleg og berekraftig drivstoff, også økonomisk.

– Prosjekta som får støtte vil bli del av eit nettverk av hydrogenprodusentar langs den norske kystlinja. Dette vil gjera hydrogen meir tilgjengeleg for dei som ynskjer å satsa på ein berekraftig skipsfart, seier Nils Kristian Nakstad, administrerande direktør i Enova, i pressemeldinga.

– Den norske maritime sektoren går føre, nok ein gong. Desse prosjekta kan kutta utsleppa i Norge, men vil også bidra til omstillinga i resten av Europa og verden, seier klima- og miljøminister Tore O. Sandvik (Ap) i pressemeldinga.

Energiminister Terje Aasland (Ap) supplerer:

– Gratulerer til prosjekta som har fått støtte i dag. Det er fantastisk å sjå så mange aktørar satsa på innovative og utsleppsfrie løysingar. Norge har ein lang tradisjon som leiande maritim nasjon. Det vi gjer for å utvikla utsleppsfrie løysingar for maritim transport her heime vil kunne ha betyding langt utanfor våre grenser.

Ein stor dag

To av dei fem prosjekta som no får pengar, involverer selskapet Hydrogen Solutions (HYDS). Det har kontor på Stord, og har eit par kvinnheringar i sentrale roller. Ove Røssland er styremedlem og medeigar, medan Knut Førland er varamedlem til styret, medeigar og dagleg leiar i Liquiline – som er eit heileigd dotterselskap av HYDS. SKL eig 45% av aksjane i HYDS.

– Det vart utrulege 386 millionar i støtte til HYDS. Det å få full utteljing på begge søknadene våre er ei stor bragd, og dette er som 17. mai og julaftan på same dag. Samtidig er dette ein stor dag for å få ned klimagassutsleppa innanfor maritim sektor, kommenterer Førland til Grenda.

Dei to prosjekta deira er følgjande:

* Hydrogenanlegg i Egersund i Rogaland: Kaupanes Hydrogen, eigd av Hydrogen Solutions, Dalane Energi og Eigersund Næring og Havn. Støttebeløp: 206 millionar norske kroner.

* Hydrogenanlegg i Florø i Vestland: HyFuel, eigd av Hydrogen Solutions, Fjord Base og Sogn og Fjordane Energi. Støttebeløp: 180 millionar norske kroner.

– Eg er utruleg stolt av teamet som har jobba saman om desse søknadene, og står klare til ei utviding av Kaupanes Hydrogen og ein realisering av produksjonsanlegget HyFuel. Det gode samarbeidet mellom eigarane i begge prosjekta skal no vidareførast, leia av HYDS, gjennom planleggings-, bygge- og driftsfasen, seier dagleg leiar Thor Henrik W. Hagen i ei pressemelding frå HYDS.

Pionerar

– Dette er pionerar som går i front for hydrogen, og sikrar forsyninga langs norskekysten. Det vil sikra grunnlaget for at hydrogen kan utvikla seg til å bli eit drivstoff mange kan ta i bruk, rosar Nils Kristian Nakstad.

Dei fem prosjekta gjev ein samla produksjonskapasitet på 120 MW, som tilsvarer cirka 40 tonn hydrogen per dag. Samla vil prosjekta som har fått støtte under Enova si satsing, no og i 2022, bidra til ein utsleppsreduksjon på 200.000 tonn CO2 per år.

Enova si satsing har overskrifta «Hydrogenproduksjon til maritim transport 2027», noko som viser til at anlegga kan levera hydrogen til marknaden frå år 2027.