Gift i 65 år: Hemmelegheita bak eit langt ekteskap

Margrethe og Idar frå Halsnøy har alltid visst om kvarandre, men det var først då Idar gjorde eit stunt det oppstod søt musikk mellom dei.

– Me møttest 19. september 1952. Eg var 21 år, og var nett ferdig i militæret. Eine kompisen min var med søster til Margrethe på denne tida, og det var slik eg oppdaga ho, fortel Idar.

Margrethe minnast at Idar dukka opp på basar i fabrikken i Toftevågen.

– Eg sat å delte ut lodd saman med fleire koner då Idar kom inn døra. Han hoppa like så greit over disken, og sat seg ved sida av meg, ler Margrethe.

– Då skulle du sitt utrykket til konene som stod rundt, ler Idar.

Det var då Margrethe fekk augene opp for sjarmøren frå Eidsvik, sjølv om dei eigentleg ikkje kjente noko til kvarandre.

Kjærleik ved fyrste blikk

Ein kan seia at det var kjærleik ved fyrste blikk, for paret har heldt saman sidan. Berre fira år seinare gifta dei seg og bygde hus på Eidsvik. Eit år seinare fekk dei eldste dottera, Ada. Til saman har dei tre døtre og ein son.

Idar arbeida som platearbeidar på Stord i fire år, før han fekk jobb på Hillestadvågen i Høylandsbygd. I 1976 overtok han jorda på heimstaden sin, då bror hans vart sjuk. Her slo dei høy og sette poteter og gulrøter i 23 år. Han nytta dei ledige stundene på sjøen. Idar er oppvaksen ved sjøen, og har alltid likt å fiske.

– Eg har heldt på med både laksefiske, ålefiske og brislingfiske, og når det var sesong for det, dreiv eg med hummarfiske. Det gjer eg endå. Sjøen og stranda var leikeplassen som gutunge, og ein fin arbeidsplass i seinare tid, smilar Idar.

Margrethe har jobba på stasjonen på Sæbøvik i 12 år, før ho starta i vaskejobb på gamleskulen og flytta opp til nye skulen då den vart til. I seinare tid har ho jobba på frisørsalongen til dottera Jane, og her jobbar 86-åringen endå.

– Eg har alltid likt å vaske. Her heime likar eg å ha det reint og fint, så eg vaskar litt kvar dag. Det gjer eg også på frisørsalongen, i tillegg prisar eg og plassera varer, kostar golv og lagar permanentar. Det er skikkelig kjekt, spesielt sidan eg får snakka med mange kjekke kundar, smilar ho.

Reisevante

Margrethe arbeidar både dag og kveld på salongen, men då ho tek seg fri, er paret flinke å gjera kjekke ting saman. Dette ekteparet er imponerande spreke.

– Me har mellom anna vore med på seniordans i mange år. Det har vore skikkelig kjekt, og ikkje minst godt for hovudet og kroppen. Utanom det har me gått turar kvar dag, og er flinke til å aktivisera oss. Slik held me oss i god form, fortel Idar.

– Me likar oss helst ute i frisk luft, og nyttar mykje av tida i hagen. Me er snare å setja oss ut då det er fint vêr, og tek ofte måltida ute på terrassen, legg Margrethe til.

Ekteparet har òg hatt ei stor gleda av å reise å oppdaga nye stader.

– Me reiste mykje når me var unge, men også no i seinare tid. Dottera vår Jane har vore i heile 137 land, og me har vore med ho på nokre av dei. Me har mellom anna vore på øya Rarotonga, som mogleg er ein av dei kjekkaste plassane me har besøkt, fortel Margrethe.

– Her var det så enkelt og gamaldags, og mange snille folk. Eg har aldri vore glad i å fyka, men eg har likevel vore med, smiler Idar.

Dei har også vore på New Zealand, Hawaii, Thailand, Tyrkia, Kypros, Spania, Ukraina, London, Italia, New York og Los Angeles for å nemna nokre.

Usedvanleg spreke

Margrethe likar å bake og lage mat. Middagen lagar ho frå botnen av kvar dag, elles bakar ho både potetkaker, nordlandskaker og mjølkekaker.

– Me likar vanleg, gammaldags mat. Idar fiskar og eg lagar. Det går difor mykje i fisk, men også kjøt og andre ting. Me har også dessert kvar dag, seier ho.

Margrethe fortel at tidlegare lege Odd Kvamme undra ofte på kva ekteparet åt, for til alderen å seia er dei usedvanleg spreke. Tablettar og medisin tek dei heller ikkje, og kva så gjere det kan dei ikkje svara på.

Kva trur dykk er hemmelegheita til eit langt ekteskap?

– Me finn på mykje kjekt saman, og det trur eg er viktig. Om han er utanfor å arbeidar med noko, hjelp eg til, og det gjer han for meg også. Me likar å hjelpe kvarandre, og vera saman så ofte me kan. Eg bakar mellom anna mjølkekaker kvar laurdag, og då kosar me oss litt ekstra. Slike små gleder trur eg er viktig å ta seg tid til, smiler Margrethe.

Det er enkelt å sjå at Margrethe og Idar er glad i kvarandre.

– Det har sjeldan vore krangling. Me har hatt det svært godt saman, sluttar Idar.

Dei lever eit sunt, godt og innhaldsrikt liv. Det er både inspirerande og rørande og sjå, og oppskrifta er verken å finna på nett eller del-bar. Det er noko kvar og ein må finne ut av i lag. Respekt, toleranse og humor er vel nokre av ingrediensane. Men, størst av alt er nok kjærleiken.