Gav konsesjon til 420kV-linje frå Blåfalli til Tysvær
Statnett har i dag fredag fått konsesjon til bygging av ny 420kV-kraftledning frå Blåfalli i Matre til Gismarvik i Tysvær kommune.
Publisert
Sist oppdatert
Den 88 km lange leidningstraseen vil gå frå Kvinnherad, via Etne og Vindafjord til Tysvær.
– Linja er grunnleggande viktig for Utsira Nord, for Haugaland næringspark, for elektrifisering av oppdrettsnæringa, grøn skipsfart, framtidas cruisetrafikk og tilhøyrande reiseliv og turisme og for kapasitetsutviding for industrien i vårt område, melder konsernsjef i Haugaland Kraft Pablo Barrera i ei pressemelding i samband med offentleggjeringa av konsesjonstildelinga.
Annonse
Linja vil syta for auka straumforsyning til Haugalandet og Sunnhordland, og økt linjekapasitet nordover til Bjørnafjorden, legg han til.
Denne linja er ei forlenging av den andre linja som Statnett vil oppgradera, altså den ønska 420 kV-linja frå Mauranger til Matre. I Kvinnherad er det spesielt spørsmålet om korleis utvidinga av linja skal gjerast gjennom Rosendal og opp Omvikdalen som har vore diskutert med ein viss temperatur til no.
Linja som fekk konsesjon i dag har ikkje vore omstridd i Kvinnherad, men spesielt i Etne har linja vore kontroversiell, fordi ho skal ha trasé gjennom Etnefjella. I Kvinnherad skal linja gå over Fjellhaugen skisenter, innover mot Bergstølsvatnet, Vika og Øvstebø, og mellom anna forbi inntaket til Vika Kraft, så seg mot Baugstranda der det blir fjordkryssing over til Etne.
Lars Emil Berge er blant grunneigarane som får denne linja over sine eigedommar. Han er også medeigar i Vika Kraft.
Annonse
– Eg er grunneigar, og har ingen problem med at linja kjem over vår grunn. Det er teikna inn ei mast midt i røyrgata vår i Vika Kraft som må flyttast litt på, men elles tykkjer eg dette er greitt, seier Berge til Grenda.
