Gav alt i VM: – Formen var som venta ikkje god nok

Ikledd den norske landslagstrøya, tråkka Vidar Mehl og dei tre andre landslagskollegaene i gang VM i e-sykkel på eit hotell i hovudstaden laurdag kveld.

Omvikdelingen hadde tidlegare i år eit mål om å sykla i mål blant dei ti beste i verdsmeisterskapen, men stilte til start med litt dårleg sjølvtillit.

– Formen var frykteleg bra lenge, men så blei den brått mykje dårlegare. Eg trudde kanskje eg hadde trent litt mykje og litt for hardt, men sånn det ser ut no så har eg mest sannsynleg hatt covid-19 utan å testa positivt. Eg har hatt alle symptom og har i ettertid slite med at kroppen ikkje har vore heilt god. Så eg er ikkje der eg skulle ha vore dagen før eit VM, sa Mehl til Grenda dagen før meisterskapen.

Slit med formen før laurdagens VM-start

Heia fram

Ramma rundt meisterskapen var god, der Mehl og dei andre landslagsutøvarane vart heia fram av publikum medan dei kjempa i den digitale VM-løypa.

– Det var veldig gøy å konkurrera saman med dei andre norske i Oslo. Atmosfæren med folk som heia gjorde det så mykje kjekkare, skriv Mehl på Instagram.

Han sykla til slutt i mål som nummer 34.

– Eg gav alt eg hadde, men formen var som venta ikkje god nok til å nå målet om topp ti, skriv Mehl.